वणी पोलिसांची धडक कारवाई; अवैध रेती वाहतुकीवर दोन जणांना अटक, साडेसहा लाखांचा मुद्देमाल जप्त
वणी (दि. ८ सप्टेंबर २०२५):
वणी पोलिसांनी अवैध रेती वाहतुकीवर मोठा धडक मोहीम राबवत दोन आरोपींना अटक केली असून, साडेसहा लाखांचा मुद्देमाल जप्त करण्यात आला आहे.
ही कारवाई सोमवारी पहाटे १:५५ ते २:३० दरम्यान मुर्धोनी परिसरात गस्तीदरम्यान करण्यात आली. पोलिसांनी ट्रॅक्टरसह अवैध रेती वाहतूक करणारे विलास रमेश आडे (३०, रा. वाघदरा) आणि तुलशिराम भगवान काकडे (३२, रा. गोकुळ नगर, वणी) यांना रंगेहाथ पकडले.
घटनास्थळावरून लाल रंगाचा महिंद्रा YUVO TECH + 575 DI ट्रॅक्टर (आरटीओ नंबर नसलेला), ट्रॉलीसह व १ ब्रास रेती असा एकूण ₹६,५६,००० किमतीचा मुद्देमाल जप्त करण्यात आला. आरोपी शासनाची कोणतीही परवानगी न घेता रेती चोरून नेत असल्याचे पोलिस तपासातून स्पष्ट झाले.
या प्रकरणी आरोपींविरुद्ध भारतीय न्याय संहिता २०२३ चे कलम ३०३(2), ३(5) अंतर्गत गुन्हा दाखल करण्यात आला असून, पुढील तपास पोलीस उपनिरीक्षक सुदाम आसोरे हे करत आहेत.
ही कारवाई उपविभागीय पोलीस अधिकारी, वणी श्री. सुरेश दळवे यांच्या मार्गदर्शनाखाली, पोलीस निरीक्षक श्री. गोपाल उंबरकर यांच्या आदेशाने, पो.उ.नि. सुदाम आसोरे, पो.का. श्याम, पो.का. विकास व पो.का. वसीम यांच्या पथकाने केली.
