सिटी हब मीडिया वणी..
भाजपच्या वरिष्ठ कार्यकर्त्याची नाराजी; राजकीय निर्णयाची शक्यता..
यवतमाळ जिल्ह्यातील एका ज्येष्ठ भाजप कार्यकर्त्याच्या नाराजीच्या चर्चेला सध्या उधाण आले आहे. युवक अवस्थेपासून पक्षाशी निष्ठा ठेवत कार्यरत असलेले, ओबीसी समाजातून येणारे आणि संघाशी जवळीक असलेले हे नेते अनेक वर्षांपासून पक्षाच्या वाढीसाठी झटत आहेत.
ग्रामीण भागात पक्षाचा झेंडा रोवण्यासाठी त्यांनी सातत्याने काम केले. मात्र, गेल्या काही महिन्यांपासून पक्षात आणि काही नेत्यांकडून त्यांना डावलले जात असल्याची तक्रार त्यांच्या कार्यकर्त्यांतून पुढे येत आहे.
सध्या हे नेते आगामी निवडणुकीच्या तयारीत आहेत. त्यांनी स्पष्ट शब्दांत सांगितले आहे की, “भाजपने न्याय दिला नाही तर पुढचा मार्ग ठरवावा लागेल.”
शहरात विजय चोरडिया यांच्या पक्षत्यागानंतर जर हा नाराज नेता देखील वेगळा निर्णय घेत असेल, तर पक्षाला ग्रामीण भागात अडचणी निर्माण होण्याची शक्यता व्यक्त केली जात आहे.
राजकीय वर्तुळात अशीही चर्चा आहे की, जर या नेत्याने आपली वाट वेगळी धरली, तर त्यांच्या सोबत अनेक कार्यकर्तेही जाण्याची शक्यता आहे.
या कार्यकर्त्याने विधानसभेपासून ते लोकसभेपर्यंतच्या निवडणुकांमध्ये पक्षाच्या उमेदवारांसाठी प्रामाणिकपणे मेहनत घेतल्याचा दावा केला आहे. ते म्हणतात की, “निवडणूक लढण्याची इच्छा सर्वांनाच असते, आणि मला विश्वास आहे की पक्षश्रेष्ठी माझ्यावर विश्वास ठेवतील आणि उमेदवारी देतील.”
या कार्यकर्त्याने केवळ महाराष्ट्रातच नव्हे, तर इतर राज्यांतही पक्षासाठी सक्रियपणे काम केले आहे. त्यामुळे त्यांच्या आगामी निर्णयाकडे सध्या राजकीय वर्तुळाचे लक्ष लागले आहे.
