वणी पोलिसांची कारवाई – अनधिकृत कीटकनाशक विक्री प्रकरणी दोघांना अटक.
वणी तालुक्यातील वाघदरा फाटा येथे अनधिकृत कीटकनाशक विक्री करत असलेल्या दोन इसमांना वणी पोलिसांनी रंगेहात पकडले. ही कारवाई कृषी विभाग व स्थानिक गुन्हे शाखेच्या संयुक्त पथकाने केली.
कृषी अधिकारी (गुण नियंत्रण) दीपक वानखेडे यांना मिळालेल्या गुप्त माहितीनुसार, आदिलाबाद(तेलंगणा) येथील योगेश गुणवंतराव देशमुख (44) व सचिन शंकर उरकुडे (40) हे महाराष्ट्रात प्रतिबंधित असलेले फवारणीचे औषध विक्रीसाठी आणत असल्याची माहिती मिळाली. यानंतर L.C.B. चेA.P.I. दत्ता पेंडकर, पंच, व कृषी विभागाचे अधिकारी यांच्या उपस्थितीत वाघदरा फाट्यावर सापळा रचण्यात आला.
सायंकाळी 7 वाजता संशयित MH-29 R-3029 क्रमांकाची मारुती सुझुकी कार तपासली असता, त्यामध्ये अनधिकृत कीटकनाशकाचे 80 बॉक्स व 10 बाटल्या (किंमत ₹2,14,190) तसेच कार(किंमत ₹3,00,000) असा एकूण ₹5,14,190 किमतीचा मुद्देमाल जप्त करण्यात आला.
दोन्ही आरोपींवर महाराष्ट्र शासन, कृषी विभाग आणि शेतकऱ्यांची फसवणूक केल्याचा आरोप असून, वणी पोलीस ठाण्यात भारतीय न्याय संहिता 2023 चे कलम 318(4) व 3(5) अंतर्गत गुन्हा दाखल करण्यात आला आहे. पुढील तपास पोलीस निरीक्षक गोपाल उंबरकर करत आहेत.
