दसऱ्याच्या दिवशी वणी शहरात एक हृदयद्रावक घटना घडली. वणी–मुकुटबन मार्गावरील उमरी गावाजवळ रस्त्यावर नादुरुस्त उभ्या असलेल्या ट्रकवर दुचाकी आदळल्याने दोन युवकांचा जागीच मृत्यू झाला.
मृत युवकांची नावे सचिन प्रकाश येल्लारवार (वय २५, रा. गायकवाड लेआऊट, नांदेपेरा रोड) व संदीप विजय चामूलवार (वय ३८) अशी आहेत. दोघेही मुकुटबन येथून काम आटोपून दुचाकीवरून वणी शहराकडे परत येत असताना सायंकाळी साडेसातच्या सुमारास हा अपघात झाला.
सदर ट्रक मागील तीन दिवसांपासून नादुरुस्त अवस्थेत रस्त्यावर उभा होता. ट्रकवर दुचाकी जोरात आदळल्याने दोघांना गंभीर दुखापत झाली. डोक्यावर व छातीवर जबर मार बसल्यामुळे घटनास्थळीच त्यांचा मृत्यू झाला.
माहिती मिळताच वणी पोलिस घटनास्थळी दाखल झाले. पंचनामा करून मृतदेह वणी ग्रामीण रुग्णालयात पाठवण्यात आले. अपघातासाठी जबाबदार असलेला ट्रक डोलामाईटने भरलेला असून पोलिसांनी तो ताब्यात घेतला आहे. पुढील तपास सुरू आहे.
दसऱ्यासारख्या शुभदिनी ही दुर्दैवी घटना घडल्याने वणी शहरात शोककळा पसरली असून नागरिकांत हळहळ व्यक्त केली जात आहे.
