सिटी हब मिडिया वणी…
वणी–यवतमाळ मार्गावर करंजी जळका जवळ बस–ट्रकची भीषण टक्कर; जखमी व मृतांचा आकडा अद्याप अस्पष्ट…
वणी–यवतमाळ मार्गावर पांढरकवडा जवळील करंजी जळका गावाजवळ आज सायंकाळी साधारण आठ वाजताच्या दरम्यान बस आणि ट्रकची भीषण टक्कर झाली. या अपघातात अनेक जण ठार झाल्याची प्राथमिक माहिती मिळत असून मृतांचा आकडा अद्याप स्पष्ट झालेला नाही. जखमी प्रवाशांची संख्या देखील मोठी असून काही जणांची प्रकृती गंभीर असल्याचे समजते.
टक्कर इतकी भीषण होती की ट्रकने बसला अनेक मीटरपर्यंत ओढत नेले. धडकेचा आवाज मोठा असल्याने परिसरातील नागरिकांनी घटनास्थळी धाव घेतली. बस आणि ट्रक दोन्ही वाहनांचे मोठे नुकसान झाले आहे.
अपघातग्रस्त बस ही एमएच 40 Y 5782 क्रमांकाची असून ही बस वणीवरून यवतमाळकडे जात होती, तर ट्रक करंजीवरून वणीच्या दिशेने येत होता. दोन्ही वाहनांची आमने–सामने टक्कर झाल्याने प्रवाशांना मोठा फटका बसला.
जखमींना तातडीने उपचारासाठी हलविण्यात आले असून काही रुग्णांना पांढरकवडा ग्रामर रुग्णालयात दाखल करण्यात आले आहे, तर गंभीर जखमींना यवतमाळ येथील शासकीय रुग्णालयात हलविण्यात आले आहे. रुग्णालयांमध्येही गोंधळाचे वातावरण असून वैद्यकीय पथके उपचारात गुंतली आहेत.
अपघाताचे नेमके कारण अद्याप अस्पष्ट असून पोलिस तपास करत आहेत. घटनास्थळी लोकांची मोठी गर्दी जमली असून मृतांचा आकडा वाढण्याची भीती व्यक्त केली जात आहे. प्रशासन परिस्थिती नियंत्रणात आणण्यासाठी प्रयत्नशील आहे.
