सिटी हब मिडिया वणी…
शहराच्या जैन ले-आऊट भागात रविवारी मध्यरात्रीनंतर एका बंद घराचे कुलूप तोडून आत शिरलेल्या घरफोड्याला सतर्कतेमुळे रंगेहात पकडण्यात आले आहे. याप्रकरणी वणी पोलीस ठाण्यात गुन्हा दाखल करण्यात आला असून, अटक करण्यात आलेल्या आरोपीची ओळख सचिन उर्फ बादशाह संतोष नगराळे (३०, रा. पोहना, ता. वणी) अशी पटली आहे.
नेमकी घटना काय?
जैन ले-आऊटमधील रहिवासी फिर्यादी कुणाल अनिल पाऊनकर (२४) यांच्या घराशेजारी सुभाष ब्राम्हणे यांचे घर आहे. दिनांक ०९/०३/२०२६ रोजी पहाटे २:३० वाजताच्या सुमारास आरोपी सचिन उर्फ बादशाहने ब्राम्हणे यांच्या बंद घराचे कुलूप आणि कोंडा तोडला. तो चोरीच्या उद्देशाने घरात प्रवेश करत असतानाच, फिर्यादीच्या लक्षात हा प्रकार आला. कोणताही विलंब न लावता तातडीने हालचाल करत आरोपीला जागीच पकडण्यात आले.
पोलीस कारवाई…
या घटनेनंतर फिर्यादी कुणाल पाऊनकर यांनी तत्काळ पोलिसांना माहिती दिली. त्यांच्या तक्रारीवरून वणी पोलीस ठाण्यात गुन्हा रजिस्टर क्रमांक ६२/२०२६ अन्वये भारतीय न्याय संहिता (BNS) च्या कलम ३३१(४) (रात्री घरफोडी करणे) आणि ३०५(अ) (चोरीसाठी घरफोडी) नुसार गुन्हा दाखल करण्यात आला आहे.
घटनेची गंभीरता लक्षात घेता, पहाटे ६:०२ वाजता गुन्हा दाखल करण्यात आला. सध्या या प्रकरणाचा पुढील तपास वणी पोलीस ठाण्याचे पोलीस नाईक विशाल राठोड (मो. क्र. ९३०७४४८८४३) हे वरिष्ठ अधिकाऱ्यांच्या मार्गदर्शनाखाली करत आहेत. या अटकेमुळे शहरातील इतर काही घरफोडीच्या घटनांचा उलगडा होण्याची शक्यता वर्तवली जात आहे
