सिटी हब मिडिया वणी…
वणी नगरपरिषद निवडणूक 2025 मध्ये भारतीय जनता पक्षाने एकहाती सत्ता आपल्या ताब्यात घेत राजकीय वर्चस्व सिद्ध केले आहे. नगराध्यक्षपदासह तब्बल 18 नगरसेवक भाजपकडून निवडून आल्याने शहराच्या राजकारणात भाजपचा दबदबा पुन्हा एकदा अधोरेखित झाला आहे. या निवडणुकीत भाजपने इतर सर्व पक्षांना जोरदार धक्का देत वणीमध्ये आपले वर्चस्व कायम राखले आहे.
या ऐतिहासिक विजयानंतर 12 जानेवारी रोजी जिजाऊ माता जयंतीचे औचित्य साधून भव्य शपथग्रहण सोहळ्याचे आयोजन करण्यात आले आहे. हा सोहळा नगरपालिका आवारात मोठ्या प्रमाणावर पार पडणार असून यामध्ये भाजपच्या नगराध्यक्ष विद्याताई आत्राम या औपचारिकरीत्या नगराध्यक्षपदाची शपथ घेणार आहेत. याचवेळी निवडून आलेले 18 नगरसेवक पदभार स्वीकारणार असून, उपनगराध्यक्ष तसेच स्वीकृत सदस्यांची निवड देखील याच कार्यक्रमात होणार आहे.
भाजपकडे स्पष्ट बहुमत असल्याने उपनगराध्यक्षपद देखील भाजपकडेच जाणार हे जवळपास निश्चित मानले जात आहे. त्यामुळे वणी नगरपरिषदेत भाजपचे संपूर्ण नियंत्रण प्रस्थापित होणार आहे.
या भव्य सोहळ्याच्या तयारीसाठी भाजपने जोरदार मोर्चेबांधणी केली असून, पदाधिकारी व कार्यकर्ते युद्धपातळीवर कामाला लागले आहेत. कार्यक्रम अधिक भव्य-दिव्य करण्यासाठी विशेष नियोजन करण्यात येत असल्याची माहिती सूत्रांकडून मिळत आहे. या शपथग्रहण सोहळ्यात भाजपकडून काही मोठे राजकीय सरप्राईज मिळण्याची शक्यता वर्तवली जात आहे. मात्र, याबाबत भाजपचे वरिष्ठ नेते सध्या मौन बाळगत आहेत.
या निवडणुकीत माजी आमदार संजीव रेड्डी बोदकुरवार व शहराध्यक्ष निलेश चौधरी यांच्या नेतृत्वाखाली भाजपने यश संपादन करत आपले अस्तित्व अधिक मजबूत केले आहे. त्यांच्या नेतृत्वामुळे संघटनात्मक ताकद वाढली असून, कार्यकर्त्यांमध्ये नवचैतन्य संचारले आहे.
12 जानेवारीच्या शपथग्रहण सोहळ्यात कोणते वरिष्ठ नेते उपस्थित राहणार, कार्यक्रमाचे नेमके स्वरूप काय असेल आणि कोणते निर्णय जाहीर होतील, याबाबत सध्या उत्सुकता शिगेला पोहोचली आहे. भाजप सरप्राईज देण्यात पटाईत असल्याने, या दिवशी वणीकर जनतेला काही मोठे राजकीय संदेश मिळण्याची शक्यता नाकारता येत नाही.
या सोहळ्यानंतर वणी नगरपालिकेत भाजपचे अधिकृत राज्य सुरू होणार असून, नगराध्यक्ष विद्याताई आत्राम यांच्या हाती शहराची धुरा जाणार आहे. येत्या काळात वणीच्या विकासासाठी भाजपकडून आक्रमक व निर्णायक पावले उचलली जातील, अशी अपेक्षा व्यक्त होत आहे.
