सिटी हब मिडिया वणी…
प्रगती नगर ओपनस्पेसमध्ये वॉकिंग ट्रॅक व खेळाच्या सुविधांसाठी मागणी…
वणी नगर परिषद क्षेत्रातील प्रभाग क्रमांक २ मधील प्रगती नगर परिसरात असलेल्या ओपनस्पेसचा नागरिकांसाठी उपयुक्त वापर करण्यात यावा, यासाठी वॉकिंग ट्रॅक व खेळासाठी आवश्यक सुविधा उपलब्ध करून देण्याची मागणी करण्यात आली आहे. या संदर्भात नगरसेविका तसेच महिला व बालकल्याण समितीच्या सभापती रिता महेश पहापळे यांनी नगर परिषद अध्यक्षांकडे लेखी निवेदन सादर केले आहे.
प्रगती नगर येथील पाण्याच्या टाकीजवळील मोकळ्या जागेभोवती संरक्षक भिंत नसल्यामुळे परिसरात अस्वच्छता वाढली असून झुडपे, काटेरी वनस्पती व कचऱ्याचे ढीग साचले आहेत. यामुळे नागरिकांना विविध अडचणींचा सामना करावा लागत असून सार्वजनिक आरोग्याच्या दृष्टीने ही बाब गंभीर असल्याचे निवेदनात नमूद करण्यात आले आहे.
सदर ओपनस्पेसची स्वच्छता करून संरक्षक भिंत उभारावी तसेच नागरिकांसाठी सुरक्षित व सोयीस्कर जॉगिंग ट्रॅक विकसित करण्यात यावा, अशी मागणी करण्यात आली आहे. यामुळे लहान मुले, युवक, ज्येष्ठ नागरिक तसेच महिलांना व्यायाम व खेळासाठी योग्य सुविधा मिळू शकतील, असा विश्वास व्यक्त करण्यात आला आहे.
यासोबतच ज्येष्ठ नागरिकांसाठी बसण्याची व्यवस्था करावी आणि परिसरात वृक्षलागवड करून हिरवळ निर्माण करावी, अशी सूचनाही करण्यात आली आहे. या सुविधा उपलब्ध झाल्यास नागरिकांच्या दैनंदिन जीवनमानात सुधारणा होऊन आरोग्याच्या समस्या कमी होतील, असे मत व्यक्त करण्यात आले आहे.
ही बाब गांभीर्याने लक्षात घेऊन नगर परिषद प्रशासनाने तातडीने पाहणी करून आवश्यक कार्यवाही करावी, अशी अपेक्षा रिता पहापळे यांनी व्यक्त केली आहे.
