सिटी हब मिडिया वणी…
मध्यपूर्व आशिया, अमेरिका आणि युरोपियन देशांमध्ये सध्या सुरू असलेल्या युद्धजन्य परिस्थितीच्या पार्श्वभूमीवर, यवतमाळ जिल्ह्यात इंधन टंचाई भासण्याची शक्यता वर्तवली जात होती. मात्र, जिल्हा प्रशासनाने या अफवांचे खंडन केले असून जिल्ह्यात पेट्रोल, डिझेल आणि गॅसचा पुरेसा साठा उपलब्ध असल्याची माहिती दिली आहे.
यवतमाळचे जिल्हाधिकारी विकास मीना यांनी एका प्रसिद्धी पत्रकाद्वारे नागरिकांना आश्वस्त केले आहे की, जिल्ह्यात इंधनाचा पुरवठा सुरळीत सुरू असून कोणत्याही प्रकारची टंचाई नाही.
कंपन्यांकडून खात्री: जिल्ह्यात कार्यरत असलेल्या BPCL, HPCL आणि IOCL या तिन्ही प्रमुख तेल कंपन्यांकडे पेट्रोल, डिझेल, सीएनजी आणि एलपीजी गॅस सिलेंडरचा पुरेसा साठा उपलब्ध आहे.
पुरवठा सुरळीत राहणार: संबंधित कंपन्यांनी जिल्हा प्रशासनाला खात्री दिली आहे की, इंधनाचा पुरवठा नियमित आणि विनासायास सुरू राहील.
जिल्हा प्रशासन, पोलीस प्रशासन आणि तेल कंपन्या समन्वय राखून असून साठा कायम राहील यासाठी कटिबद्ध आहेत.
नागरिकांना आवाहन: पंपावर विनाकारण गर्दी करू नका आणि सोशल मीडिया किंवा अन्य माध्यमांतून पसरणाऱ्या चुकीच्या अफवांवर विश्वास ठेवू नका, असे आवाहन जिल्हाधिकाऱ्यांनी केले आहे.
इंधन साठा मुबलक असल्याने नागरिकांनी घाबरून जाण्याचे कारण नाही. आपल्या गरजेनुसारच इंधनाची खरेदी करावी जेणेकरून सुव्यवस्थित वितरण सुरू राहील.
