सिटी हब मिडिया वणी…
“लग्नाच्या पंगतीवर गॅस टंचाईचे सावट! वणीतील कॅटरिंग व्यावसायिक संकटात…
जागतिक स्तरावर अमेरिका आणि इराण यांच्यात उद्भवलेल्या युद्धजन्य परिस्थितीचा फटका आता स्थानिक स्तरावर बसू लागला आहे. वणी शहरासह परिसरात व्यावसायिक गॅस सिलिंडरचा तुटवडा निर्माण झाला असून, यामुळे ऐन लग्नघाईच्या हंगामात कॅटरिंग व्यावसायिक अडचणीत सापडले आहेत. या गंभीर समस्येकडे प्रशासनाचे लक्ष वेधण्यासाठी ‘एकता कॅटरिंग असोसिएशन, वणी’च्या वतीने उपविभागीय अधिकारी (SDO) यांना निवेदन देण्यात आले.
नेमकी समस्या काय?
सध्या लग्नसराईचा काळ मोठ्या उत्साहात सुरू आहे. मात्र, गेल्या काही दिवसांपासून व्यावसायिक गॅस सिलिंडरचा पुरवठा विस्कळीत झाला आहे. कॅटरिंग व्यवसाय पूर्णपणे गॅसवर अवलंबून असल्याने, सिलिंडर वेळेवर मिळत नसल्यामुळे अनेक ऑर्डर्स पूर्ण करणे कठीण झाले आहे. जर हीच परिस्थिती कायम राहिली, तर व्यवसायावर उपासमारीची पाळी येईल, अशी भीती व्यक्त केली जात आहे.
युद्धाचा परिणाम आणि भविष्यातील चिंता…
जागतिक बाजारपेठेत इंधन पुरवठ्यावर होणाऱ्या विस्कळीत परिणामांमुळे केवळ व्यावसायिकच नव्हे, तर येणाऱ्या काळात घरगुती गॅस सिलिंडरचा पुरवठाही बाधित होण्याची शक्यता वर्तवण्यात येत आहे. आंतरराष्ट्रीय घडामोडींमुळे पुरवठा साखळीवर ताण आल्यास वणीसारख्या भागात गॅस टंचाई अधिक तीव्र होऊ शकते.
असोसिएशनची प्रमुख मागणी…
‘एकता कॅटरिंग असोसिएशन’चे अध्यक्ष कैलास बोबडे यांच्या नेतृत्वाखालील शिष्टमंडळाने निवेदनात म्हटले आहे की, “ग्राहकांकडून आगाऊ बुकिंग झालेली आहे. अशा वेळी गॅस सिलिंडर न मिळाल्यास ग्राहक आणि व्यावसायिक यांच्यात वाद निर्माण होण्याची शक्यता आहे. प्रशासनाने याकडे जातीने लक्ष देऊन त्वरित उपाययोजना करावी.”
प्रशासनाचे आश्वासन…
या निवेदनाची दखल घेत, उपविभागीय अधिकारी यांनी ही समस्या अत्यंत गंभीर असल्याचे मान्य केले. त्यांनी आश्वासन दिले की, “जिल्हाधिकारी कार्यालय आणि वरिष्ठ पातळीवर या तुटवड्याबाबत माहिती पोहोचवून तातडीने पुरवठा सुरळीत करण्यासाठी प्रयत्न केले जातील.”
या निवेदनाच्या प्रती जिल्हाधिकारी यवतमाल, वणी विधानसभा क्षेत्राचे आमदार आणि तहसीलदार यांनाही पाठवण्यात आल्या आहेत…
