प्रभाग क्रमांक चारमध्ये काँग्रेस समर्थक धीरज भोयर यांच्या धडाकेबाज भाजप प्रवेशाने राजकीय समीकरणे पूर्णपणे बदलताना दिसत आहेत. आतापर्यंत या प्रभागात भाजपच्या बाजूने अनुकूल वातावरण निर्माण झाले होते, मात्र धीरज भोयर यांच्या प्रवेशानंतर हे वातावरण वाऱ्यापासून थेट वादळात परिवर्तित होण्याची शक्यता राजकीय जाणकारांनी व्यक्त केली आहे.
धीरज भोयर यांनी महाविकास आघाडीकडे तिकीटाची मागणी केली होती, परंतु त्यांना तिकीट नाकारत प्रवीण ढोके यांना उमेदवारी देण्यात आली. यामुळे असंतुष्ट झालेल्या धीरज भोयर यांनी मागील काही दिवसांपासून नाराजी व्यक्त केली होती. अखेर आज महसूल मंत्री चंद्रशेखर बावनकुळे यांच्या उपस्थितीत त्यांनी भाजपमध्ये जाहीर प्रवेश घेतला.
ओबीसी वर्गातील लोकप्रिय आणि प्रभावी नेतृत्व म्हणून धीरज भोयर यांचे नाव प्रभागात ओळखले जाते. त्यामुळे त्यांच्या प्रवेशामुळे भाजप उमेदवार राकेश बुग्गेवार आणि अर्चना पुनवटकर यांच्या विजयाला मोठी चालना मिळणार असल्याचे राजकीय विश्लेषकांचं मत आहे.
दरम्यान, राकेश बुग्गेवार व अर्चना पुनवटकर यांचा घराघरातील प्रचार वेगात सुरू असताना धीरज भोयर यांच्या प्रवेशाची बातमी भाजपसाठी अत्यंत सुखद मानली जात आहे. तसेच भाजपच्या नगराध्यक्ष पदाच्या उमेदवार विद्याताई आत्राम यांना प्रभाग क्रमांक चारमधून मोठे लीड मिळण्याची अपेक्षा व्यक्त होत आहे.
