सिटी हब मिडिया वणी..
वणी नगरपरिषद 2025 ची निवडणूक भाजपने स्पष्ट बहुमताने जिंकत 18 नगरसेवकांसह नगराध्यक्ष पदावरही आपले वर्चस्व सिद्ध केले आहे. सत्तास्थापनेनंतर आता नगरपरिषदेतील दुसऱ्या क्रमांकाच्या महत्त्वाच्या असलेल्या उपाध्यक्ष पदाकडे सर्वांचे लक्ष लागले असून, “साहेबांच्या कानावर शब्द टाकला आहे” अशा चर्चांनी भाजप गोटात राजकीय हालचालींना वेग आला आहे.
नवीन तसेच अनुभवी नगरसेवकांमध्ये उपाध्यक्षपदासाठी उत्सुकता वाढली असून, प्रत्येक जण आपणच या पदासाठी योग्य असल्याचे दाखवण्याच्या प्रयत्नात आहे. वरिष्ठ नेतृत्वापर्यंत आपले नाव पोहोचावे यासाठी समर्थकांसह नेत्यांच्या भेटीगाठी, चर्चासत्रे आणि शिफारसींची फिल्डिंग सुरू असल्याचे चित्र सध्या दिसून येत आहे. “साहेबांनी माझ्यासाठी सकारात्मक विचार करण्याचे संकेत दिले आहेत” अशा दाव्यांमुळे इच्छुकांची संख्या अधिक वाढली आहे.
सूत्रांच्या माहितीनुसार, येत्या 12 जानेवारी रोजी होणाऱ्या पदग्रहण समारंभात नगराध्यक्ष व नगरसेवक अधिकृतपणे पदभार स्वीकारणार असून, याच कालावधीत उपाध्यक्ष पदाबाबतची घोषणा होण्याची शक्यता आहे. त्यामुळे त्या तारखेपर्यंत भाजपमधील अंतर्गत हालचाली अधिक तीव्र होण्याची शक्यता व्यक्त केली जात आहे.
दरम्यान, भाजपच्या वरिष्ठ नेतृत्वाच्या जवळच्या सूत्रांनी स्पष्ट केले आहे की, सध्या कितीही लॉबिंग सुरू असले तरी उपाध्यक्ष पदाचा अंतिम निर्णय हा पक्षाची शिस्त, संघटनात्मक समतोल आणि राजकीय गणित लक्षात घेऊनच 12 जानेवारीला घेतला जाईल. त्यामुळे सध्या सुरू असलेल्या चर्चांमधून नेमका कोण बाजी मारणार, हे पाहणे औत्सुक्याचे ठरणार आहे.
