शिवसेना शिंदे गटाचे यवतमाळ, राळेगाव व वणी विधानसभा क्षेत्राचे संघटन मंत्री विजय चोरडिया यांनी शिवसेना पदाधिकारी व कार्यकर्त्यांच्या उपस्थितीत हिंदूहृदयसम्राट बाळासाहेब ठाकरे यांच्या शताब्दी जयंतीनिमित्त त्यांच्या पुतळ्याला पुष्पहार अर्पण करून अभिवादन केले.
यावेळी बोलताना विजय चोरडिया यांनी सांगितले की, बाळासाहेब ठाकरे यांनी उभारलेली शिवसेना ही केवळ राजकीय पक्ष नसून ती सामान्य माणसाच्या हक्कांसाठी लढणारी चळवळ आहे. येणाऱ्या काळात यवतमाळ जिल्ह्यात शिवसेनेची मजबूत पक्षबांधणी करून संघटन अधिक बळकट करण्यासाठी आपण पूर्णपणे सक्रिय राहणार असल्याचा निर्धार त्यांनी व्यक्त केला.
तसेच शिवसेना नेते व राज्याचे उपमुख्यमंत्री एकनाथ शिंदे तसेच जिल्ह्याचे पालकमंत्री संजय राठोड यांच्या मार्गदर्शनाखाली शिवसेनेचा विस्तार अधिक प्रभावीपणे करण्यात येईल. सामान्य जनतेच्या प्रश्नांसाठी सातत्याने रस्त्यावर उतरून लढा देत शिवसेना एक मजबूत ताकद म्हणून समोर येईल, असा विश्वासही त्यांनी व्यक्त केला.
नेताजी सुभाषचंद्र बोस यांच्या जयंतीनिमित्त त्यांच्या प्रतिमेला पुष्पहार अर्पण करून अभिवादन करण्यात आले. नेताजींच्या देशभक्ती, त्याग व संघर्षातून प्रेरणा घेऊन समाजहितासाठी कार्य करण्याचा संकल्प यावेळी करण्यात आला.
या प्रसंगी शिवसेनेचे विविध पदाधिकारी, कार्यकर्ते मोठ्या संख्येने उपस्थित होते.
