सिटी हब मिडिया वणी…
वणी तालुक्यातील चिखलगाव परिसरात बुधवारी सायंकाळी एक अत्यंत दुर्दैवी व धक्कादायक घटना उघडकीस आली. उच्चशिक्षित व प्राचार्य पदावर कार्यरत असलेल्या एका शिक्षिकेने आपल्या राहत्या घरात गळफास घेऊन आत्महत्या केल्याने परिसरात खळबळ उडाली आहे.
युगंधरा स्वप्नील खरबडे (वय अंदाजे ३५ वर्षे) असे मृत महिलेचे नाव असून त्या चिखलगाव येथील महादेव नगर परिसरातील एका बहुमजली इमारतीत पतीसह वास्तव्यास होत्या. त्या येथील राजकुंवर महिला महाविद्यालयात प्राचार्य म्हणून कार्यरत होत्या.
मिळालेल्या माहितीनुसार, बुधवारी सकाळी स्वप्नील खरबडे हे कामानिमित्त मारेगाव येथे गेले होते. सायंकाळी घरी परतल्यानंतर त्यांनी अनेक वेळा घराचा दरवाजा ठोठावला, मात्र आतून कोणताही प्रतिसाद मिळाला नाही. घराचा दरवाजा आतून बंद असल्याने त्यांनी अखेर दरवाजा तोडून घरात प्रवेश केला. यावेळी बेडरूममध्ये युगंधरा खरबडे यांनी गळफास घेतल्याचे आढळून आले.
घटनेची माहिती मिळताच वणी पोलीस तात्काळ घटनास्थळी दाखल झाले. पंचनामा करून मृतदेह ताब्यात घेण्यात आला व उत्तरीय तपासणीसाठी वणी ग्रामीण रुग्णालयात पाठवण्यात आला. या घटनेची माहिती मृत महिलेच्या आई-वडिलांना देण्यात आली असून ते तत्काळ वणी येथे दाखल झाले.
मृत युगंधरा यांच्या पश्चात पती, १३ वर्षांचा मुलगा व अवघ्या ३ महिन्यांची चिमुकली मुलगी असा परिवार आहे. काही महिन्यांपूर्वीच त्यांनी महादेव नगर येथे सदर फ्लॅट खरेदी केला होता. आत्महत्येमागील नेमके कारण अद्याप स्पष्ट झाले नसून, पोलीस अधिक तपास करत आहेत.
