सुनिल तुगनायत, सिटी हब मिडिया वणी…
वणी आणि परिसरात ड्रग्ज रॅकेट उद्ध्वस्त; एमडी तस्करांच्या मुसक्या आवळण्यात पोलिसांना मोठ यश…
युवा पिढीला अमली पदार्थांच्या विळख्यात ओढणाऱ्या एका मोठ्या ड्रग्ज नेटवर्कचा वणी पोलिसांनी पर्दाफाश केला आहे. वणी शहर आणि लगतच्या ग्रामीण भागात पसरलेल्या मॅफेड्रॉन (MD) या अमली पदार्थाच्या काळ्या बाजाराविरोधात ठाणेदार भानुदास पिदूरकर यांच्या मार्गदर्शनाखाली पोलिसांनी धडक मोहीम राबवली आहे. या संपूर्ण कारवाईत आतापर्यंत तब्बल आठ संशयितांना अटक करण्यात आली असून, हा तपास आता इतर शहरांपर्यंत पोहोचला आहे.
अशी झाली कारवाईची सुरुवात:
या मोठ्या रॅकेटचा सुगावा स्थानिक गुन्हे शाखेला (LCB) एका गोपनीय माहितीद्वारे लागला. जून महिन्याच्या मध्यात, पोलिसांनी एसपीएम शाळा परिसराजवळ सापळा रचून सौरभ खैरे आणि प्रथमेश गुंडेवार या दोघांना ताब्यात घेतले. त्यांच्या झडतीत ६ ग्रॅम एमडी ड्रग्ज हस्तगत करण्यात आले. येथूनच पोलिसांच्या हाती या रॅकेटचे मुख्य धागेदोरे लागले.
तपासाची चक्रे फिरली आणि नावे समोर आली:
दोघांच्या चौकशीनंतर तपासाची गती वाढवत पोलिसांनी वरोरा येथील रहिवासी अक्षय पेचे याला ७ ग्रॅम अमली पदार्थासह अटक केली. संशयितांच्या मोबाईलमधील कॉल रेकॉर्ड्स आणि डिजिटल बँक ट्रान्झॅक्शन्सच्या सखोल तपासणीनंतर धक्कादायक माहिती समोर आली. यामध्ये वेकोली (WCL) कर्मचारी अविनाश पाटील, प्रज्योत ऊर्फ कॉकरोच उपरे आणि रवींद्र गुप्ता यांचा थेट सहभाग आढळल्याने त्यांनाही बेड्या ठोकण्यात आल्या. त्यानंतर पोलिसांनी कारवाईचा पुढचा टप्पा गाठत तेलीफेल येथील रहिवासी गोलू मेश्राम याला १९.२७ ग्रॅम एमडी पावडरसह ताब्यात घेतले.
हिंगणघाट आणि नागपूर कनेक्शन उघड:
या नेटवर्कची पाळेमुळे केवळ वणीपुरती मर्यादित नसून विदर्भातील इतर शहरांमध्येही पसरल्याचे उघड झाले आहे. पोलिसांनी हिंगणघाट येथून युसूफ नावाच्या एका तरुणाला अटक केली आहे, ज्याच्या अटकेमुळे आरोपींची एकूण संख्या आठ झाली आहे. दुसरीकडे, शिरपूर पोलिसांनीही या गुन्ह्याशी संबंधित मुख्य पुरवठादार राजिक अन्सारी याला थेट नागपूरमधून अटक करून कारागृहात रवाना केले आहे. यापूर्वी शिरपूर पोलिसांनी चंद्रपूर-वणी महामार्गावर श्रेयस ऊर्फ गुड्डू पाटील आणि अक्षय बागडदे यांना ५६ ग्रॅम ड्रग्जसह कारमध्ये पकडले होते.
अनेक संशयित पोलिसांच्या रडारवर:
अटक केलेल्या सर्व आरोपींविरुद्ध अमली पदार्थ विरोधी कायद्यांतर्गत (NDPS Act) गुन्हे दाखल करण्यात आले आहेत. पोलिसांच्या प्राथमिक अंदाजानुसार, ड्रग्जच्या पैशांची देवाणघेवाण करणाऱ्या आणि या व्यवसायाशी जोडल्या गेलेल्या शेकडो लोकांची नावे सध्या पोलिसांच्या संशयित यादीत आहेत. येत्या काळात या प्रकरणात अनेक नामांकित आणि पांढरपेशा चेहरे उघडकीस येण्याची शक्यता असून, पोलिसांची कारवाई अधिक तीव्र होणार असल्याचे संकेत मिळत आहेत.
