यवतमाळ येथे आयोजित शिवसेना (बाळासाहेब ठाकरे) पक्षाच्या कार्यकर्ता शिबिरात काँग्रेस, भाजप आणि इतर पक्षातील अनेक नेत्यांनी शिंदे गटात प्रवेश करून राजकीय समीकरणांमध्ये खळबळ माजवली आहे.
या कार्यक्रमात पालकमंत्री संजय राठोड व माजी आमदार विश्वास नांदेकर यांच्या हस्ते काँग्रेसचे युवा नेते व व्यवसायिक निलेश परगंटीवार, तिरळे कुणबी समाजाचे माजी अध्यक्ष व हिंदुत्ववादी युवा नेता कार्तिक देवडे, तसेच माजी नगराध्यक्ष अरुण पटेल यांनी शिवसेना (बाळासाहेब ठाकरे) पक्षात प्रवेश केला.
कार्यक्रमास मंत्री गुलाबराव पाटील, प्रतापराव जाधव, संजय राठोड, विश्वास नांदेकर आणि विजय चोरडिया आदी मान्यवर उपस्थित होते.
भाजपचे विजय चोरडिया यांनी काही दिवसांपूर्वीच शिंदे गटात प्रवेश घेतल्यानंतर आता काँग्रेसचा युवा चेहरा निलेश परगंटीवार यांनीही हातातील पंजा सोडून धनुष्यबाण हाती घेतला आहे.
परगंटीवार हे लोकप्रिय, सामाजिक कार्यात सक्रिय आणि श्रीराम सेनेचे संस्थापक सदस्य आहेत. त्यांच्या पाठिशी प्रभागातील युवा व सामान्य वर्गाचा मोठा पाठिंबा असल्याने या प्रवेशामुळे प्रभाग क्रमांक ४ मधील राजकीय गणिते पूर्णपणे बदलण्याची शक्यता आहे.
माजी नगराध्यक्ष अरुण पटेल तसेच हिंदुत्ववादी युवा नेता आणि क्रिकेटपटू म्हणून ओळखले जाणारे कार्तिक देवडे यांच्या प्रवेशाने शिवसेनेच्या संघटनेत नवीन ऊर्जा निर्माण झाली आहे.
सध्या शिंदे गटात सतत “इन्कमिंग” सुरू असल्याने आगामी निवडणुकांमध्ये राजकीय मैदानात चुरस वाढण्याची चिन्हे दिसत आहेत.
माजी आमदार विश्वास नांदेकर यांच्या मार्गदर्शनाखाली शिंदे गट आता गुलाबी थंडीतच प्रस्थापितांना घाम फोडण्यास सज्ज असल्याचे स्पष्ट होत आहे.
City Hub Media
