निलेश परगंटीवार यांच्या प्रवेशानंतर प्रभाग क्रमांक चारमध्ये राजकीय समीकरणात उलथापालथ…
वणी: काँग्रेसचे युवा नेते आणि उद्योजक निलेश परगंटीवार यांनी शिवसेना (शिंदे गट) मध्ये प्रवेश घेतल्यानंतर वणी नगरपरिषद क्षेत्रातील प्रभाग क्रमांक चार मधील राजकीय समीकरणं चांगलीच बदलली आहेत.
नवीन आराखड्यानुसार या प्रभागात पूर्वीच्या प्रभाग क्रमांक पाच मधील काही भागांचा समावेश झाल्याने मतदारसंख्येत आणि राजकीय स्थितीत बदल झाला आहे. मागील निवडणुकीत या भागातून भाजपचे नगरसेवक निवडून आले होते. मात्र यंदा निलेश परगंटीवार यांच्या प्रवेशामुळे सामना अधिक रंगतदार होण्याची शक्यता व्यक्त केली जात आहे.
परगंटीवार यांच्या मागे मोठा युवा वर्ग असून, सर्वसामान्य नागरिकांचाही पाठिंबा मिळत आहे. प्रखर हिंदुत्ववादी विचारसरणीचे ते युवा नेतृत्व असून, श्रीराम सेनेचे जिल्हाध्यक्ष या नात्याने त्यांचा मोठा प्रभाव प्रभागात आहे. दरवर्षी ते वणी ते शिरपूर त्रिशुळ यात्रेचे आयोजन करतात, ज्यात हजारोंचा सहभाग असतो — हे त्यांच्या संघटन कौशल्याचे द्योतक मानले जाते.
स्थानिक पातळीवर लहान-मोठ्या समस्यांवर तत्परतेने धाव घेणारे, सामाजिक कार्यात सातत्याने पुढे असलेले व्यक्तिमत्व म्हणूनही त्यांचा लौकिक आहे. गणेशोत्सव, दुर्गोत्सव वा मुहर्रम — प्रत्येक धार्मिक-सांस्कृतिक कार्यक्रमात त्यांचा सक्रिय सहभाग दिसून येतो.
निलेश परगंटीवार यांच्या शिवसेना शिंदे गटात प्रवेशामुळे काँग्रेसला तर मोठा धक्का बसलाच, पण त्याचबरोबर प्रभागात तसेच वणी शहरात भाजपच्या प्रस्थापित नेतृत्वासमोर नवे आव्हान उभे राहिले आहे.
२०२५ मधील नगरपरिषद निवडणुकीत आता वणीमध्ये भाजप विरुद्ध शिवसेना शिंदे गट असा महायुती विरुद्ध महायुतीचा सामना रंगणार, यात कोणतीही शंका नाही.
