सिटी हब मिडिया वणी…
यवतमाळ जिल्ह्यात वाढत्या अवैध गुटखा तस्करीविरोधात यवतमाळ पोलिसांनी मोठी धडक कारवाई करत आंतरराज्यीय गुटखा तस्करी करणाऱ्या दोन इसमांना ताब्यात घेतले आहे. या कारवाईत तब्बल ६५ लाख ९८ हजार रुपयांचा मुद्देमाल जप्त करण्यात आला असून स्थानिक गुन्हे शाखा, यवतमाळ यांनी ही उल्लेखनीय कामगिरी बजावली आहे.
मा. पोलीस अधीक्षक, यवतमाळ यांच्या आदेशानुसार अवैध गुटखा विक्री व वाहतुकीविरोधात विशेष मोहीम राबविण्यात येत होती. त्यानुसार दिनांक २७ डिसेंबर २०२५ रोजी स्थानिक गुन्हे शाखा यवतमाळ उपविभाग पांढरकवडा वणी पथकाला गुप्त माहिती मिळाली की तेलंगणा राज्यातून राष्ट्रीय महामार्ग क्रमांक ४४ वरून पांढरकवडाकडे येणाऱ्या UP-94-AT-2305 क्रमांकाच्या आयशर वाहनामध्ये महाराष्ट्र शासनाने बंदी घातलेला सुगंधित पान मसाला व तंबाखू वाहतूक केली जात आहे.
मिळालेल्या माहितीनुसार पोलिसांनी सापळा रचून सदर वाहन थांबवले असता वाहनाची झडती घेतली. झडतीदरम्यान वाहनामध्ये विविध कंपन्यांचा सुगंधित पान मसाला व SR-1 Sended Tambaccu असा एकूण ४५,९२,०००/- रुपयांचा माल आढळून आला. तसेच वापरातील मोबाईल (किंमत अंदाजे ६,०००/- रुपये) आणि आयशर वाहन (किंमत अंदाजे २०,००,०००/- रुपये) असा एकूण ६५,९८,०००/- रुपयांचा मुद्देमाल जप्त करण्यात आला.
या प्रकरणी वाहन चालक
मोहन सियाराम यादव (वय २६ वर्षे, व्यवसाय – ड्रायव्हर, रा. पिपोड, ता. पिपोड, जि. शिपुरी, मध्यप्रदेश)
बुद्धा बाबूसिंग परिहार (वय ३७ वर्षे, व्यवसाय – मजुरी, रा. अमोला थाना, ता. घसारी, जि. शिपुरी, मध्यप्रदेश)
यांना ताब्यात घेण्यात आले आहे.
सदर कारवाई मा. पोलीस अधीक्षक श्री. कुमार चिंता, अपर पोलीस अधीक्षक श्री. अशोक योरात यांच्या मार्गदर्शनाखाली पोलीस निरीक्षक सतीश बवरे, सपोनि दत्ता पेंढकर, पोउपनि धनराज ढाके, पोउपनि गजानन राजामल, पोहवा सुनील खंडागळे, सुधीर पांडे, निलेश निमकर, सुधीर पिठुरकर, पोशी सलमान शेख, चापोशी नरेश राऊत व स्थानिक गुन्हे शाखा यवतमाळ पथकाने यशस्वीरित्या पार पाडली.
पुढील तपास पोलीस स्टेशन पांढरकवडा येथे सुरू असून अवैध गुटखा तस्करीच्या साखळीचा अधिक तपास केला जात आहे.
