सिटी हब मिडिया वणी…
शनिवार, दिनांक ०३ जानेवारी २०२६ रोजी क्रांतीज्योती सावित्रीबाई फुले जयंतीचे औचित्य साधून माळी समाज बहुउद्देशीय संस्था, वणी यांच्या कार्यालयाचा भव्य शुभारंभ उत्साहात पार पडला. भास्कर वाढई कॉम्प्लेक्स, बस स्टॉप समोर, सरकारी दवाखाना रोड, वणी येथे दुपारी ३ वाजता हा शुभारंभ सोहळा पार पडला. कार्यालयाचे उद्घाटन मा. माजी आमदार संजीव रेड्डी बोदकुरवार यांच्या शुभहस्ते करण्यात आले.
या कार्यक्रमास प्रमुख पाहुणे म्हणून माननीय निलेशजी चौधरी, नवनिर्वाचित नगराध्यक्ष आत्राम मॅडम, माननीय विजय भाऊ पिदुरकर, राकेश भाऊ बुग्गेवार, संजू भाऊ पिंपळकर, सोनाली ताई निमकर आदी मान्यवरांची उपस्थिती लाभली.
कार्यक्रमाचे प्रास्ताविक माळी समाज बहुउद्देशीय संस्थेचे अध्यक्ष श्री. भवानी भाऊ मांदाडे यांनी केले. सूत्रसंचालन व आभार प्रदर्शन वाढई सर यांनी केले. आपल्या भाषणात मा. माजी आमदार संजीव रेड्डी बोदकुरवार यांनी ज्ञानज्योती सावित्रीबाई फुले यांच्या महान जीवनकार्यावर प्रकाश टाकत समाजाच्या शैक्षणिक व सामाजिक प्रगतीसाठी एकत्रित प्रयत्नांची गरज अधोरेखित केली.
यावेळी अध्यक्ष श्री. भवानी भाऊ मांदाडे यांनी सांगितले की, “माळी समाजाचे संघटन अधिक बळकट करणे, सामाजिक, शैक्षणिक, आर्थिक व राजकीय उन्नती साधणे, समाजाच्या समस्या व हक्कांवर चर्चा व मार्गदर्शन करणे, तसेच शिक्षण, रोजगार, विवाह व सामाजिक सुधारणांसाठी एकत्र येण्याचे केंद्र म्हणून हे कार्यालय कार्यरत राहील. समाजाच्या सर्वांगीण विकासासाठी हे कार्यालय दिशादर्शक ठरेल.”
या शुभारंभ कार्यक्रमाला मोठ्या संख्येने समाज बांधव व भगिनी उपस्थित होते. उत्साही वातावरणात पार पडलेल्या या कार्यक्रमामुळे माळी समाजाच्या एकतेला व प्रगतीला नवी दिशा मिळेल, असा विश्वास उपस्थितांनी व्यक्त केला.
