सिटी हब मिडिया वणी…
औपचारिक पदभारापूर्वीच भाजपचे नवनिर्वाचित नगरसेवक राकेश बुग्गेवार कामाला लागले… औपचारिकरित्या पदभार ग्रहण करण्यापूर्वीच भाजपचे नवनिर्वाचित नगरसेवक प्रत्यक्ष मैदानात उतरून जनतेच्या समस्या सोडवण्यासाठी कामाला लागल्याचे चित्र दिसत आहे. प्रभाग क्रमांक चारचे भाजपचे नगरसेवक तथा दुसऱ्यांदा नगरपालिकेवर निवडून गेलेले राकेश बुग्गेवार यांनी आपल्या कार्यतत्परतेचा प्रत्यय दिला आहे.
वणी–नांदेपेरा रस्त्याचे काम सुरू असताना जेसीबीमुळे पाणीपुरवठ्याची पाइपलाइन फुटली होती. त्यामुळे लक्ष्मी नगर परिसरातील नागरिकांना मागील आठ ते दहा दिवसांपासून पाण्याच्या तीव्र समस्येला सामोरे जावे लागत होते. ही बाब नगरसेवक राकेश बुग्गेवार यांच्या निदर्शनास येताच त्यांनी तात्काळ दखल घेत प्रशासनाला काम पूर्ण करण्याच्या सूचना दिल्या.
विशेष म्हणजे, रविवारी सुट्टीच्या दिवशीसुद्धा प्रशासनाकडून काम करून घेत पाइपलाइन दुरुस्त करून जोडण्यात आली. त्यामुळे दीर्घकाळ पाण्याविना त्रस्त असलेल्या नागरिकांना दिलासा मिळाला आहे. या तत्पर कारवाईमुळे लक्ष्मी नगरमधील नागरिकांनी नगरसेवक राकेश बुग्गेवार यांचे आभार व्यक्त केले आहेत.
नुकतेच राकेश बुग्गेवार यांची भाजपचे गटनेते म्हणून निवड झाली असून, त्यांच्या अनुभवामुळे नगरपालिकेच्या प्रशासनावर त्यांची पकड अधिक मजबूत असल्याचे दिसून येत आहे.
यावेळी प्रतिक्रिया देताना नगरसेवक राकेश बुग्गेवार म्हणाले,
“पुढील पाच वर्षे मी याच पद्धतीने जनतेच्या सेवेसाठी सदैव उपलब्ध राहणार आहे. जनतेची कोणतीही समस्या असो, ती तात्काळ सोडवण्याचा माझा प्रामाणिक प्रयत्न राहील. माझ्या प्रभागात कोणतीही अडचण प्रलंबित राहू देणार नाही. ही तर केवळ सुरुवात आहे. प्रभाग क्रमांक चार सर्वांगसुंदर करून तो एक आदर्श प्रभाग म्हणून उभा करण्याचा माझा निर्धार आहे.”
