सिटी हब मिडिया वणी…
वणी नगरपालिकेतील भाजपचा विजय म्हणजे विकासाभिमुख राजकारणाचा विजय – हेमंत गौरकार…
वणी नगरपालिकेतील भारतीय जनता पक्षाचा दणदणीत विजय हा विकासाभिमुख राजकारणाचा स्पष्ट विजय असल्याचे प्रतिपादन खांदला गावाचे सरपंच व कृषी उत्पन्न बाजार समितीचे संचालक हेमंत गौरकार यांनी केले आहे. सिटी हब मीडियाशी बोलताना त्यांनी सांगितले की, राजकारण हे लोकांसाठी, लोकांच्या सेवेसाठी असते आणि भाजपने नेहमीच ही भूमिका जपली आहे.
भाजपने निवडणुकीत विकासाचे मुद्दे केंद्रस्थानी ठेवून जनतेसमोर भूमिका मांडली. शहरी भागातील विकासासोबतच ग्रामीण भागाच्या प्रगतीवरही भर देण्यात आला. त्यामुळेच वणीकर जनतेने भाजपवर विश्वास दाखवत एकहाती सत्ता बहाल केली, असे गौरकार म्हणाले.
ते पुढे म्हणाले की, भाजपची ही विजययात्रा येणाऱ्या पंचायत समिती, जिल्हा परिषद व ग्रामपंचायत निवडणुकांमध्येही कायम राहणार आहे. भाजपने शहरी मतदारांसह ग्रामीण भागातही आपली मजबूत पकड निर्माण केली आहे. शहरी व ग्रामीण जनतेचे जीवनमान कसे उंचावता येईल, विकासाचा लाभ तळागाळातील लोकांपर्यंत कसा पोहोचवता येईल, यासाठी भाजप सातत्याने प्रयत्नशील असते.
भाजपचे नेते व कार्यकर्ते लोकांच्या समस्या प्रशासनासमोर मांडून त्या मार्गी लावण्यासाठी कायम सक्रिय असतात. कोणतीही अडचण असो, सर्वात आधी भाजपचे कार्यकर्ते मदतीसाठी पुढे येतात. त्यामुळेच माजी आमदार संजीव रेड्डी बोदकुरवार यांच्या मार्गदर्शनाखाली माजी जिल्हा परिषद सदस्य विजय पिदुरकर आणि भाजप तालुका प्रमुख प्रदीप जेऊरकर यांच्या नेतृत्वात विकासाभिमुख राजकारणाचा लाभ आगामी स्थानिक स्वराज्य संस्थांच्या निवडणुकांमध्येही भाजपच्या उमेदवारांना निश्चितपणे होईल, असा विश्वास त्यांनी व्यक्त केला.
शहरी असो वा ग्रामीण भाग, भाजपचे उमेदवार नेहमीच जनतेच्या संपर्कात असतात. सातत्यपूर्ण भेटीगाठी व मजबूत जनसंपर्कामुळे भाजपला पोषक वातावरण तयार झाले आहे. शेतकऱ्यांच्या प्रश्नांवरही भाजप नेहमीच अग्रेसर राहिली असून, नुकत्याच जाहीर झालेल्या पॅकेजमुळे शेतकऱ्यांना मोठा दिलासा मिळाला आहे. त्यामुळे ग्रामीण भागातही भाजपचा झेंडा फडकत राहील, असे गौरकार यांनी स्पष्ट केले.
दरम्यान, भाजपच्या नवनिर्वाचित नगराध्यक्ष व सर्व नगरसेवकांचे हेमंत गौरकार यांनी अभिनंदन केले. माजी आमदार संजीव रेड्डी बोदकुरवार यांच्या मार्गदर्शनाखाली आणि शहराध्यक्ष ॲड. निलेश चौधरी यांच्या नेतृत्वात भाजप वणीकर जनतेसाठी हितकारक निर्णय घेईल. हे निर्णय ग्रामीण भागातही सकारात्मक परिणाम घडवतील आणि वणीची विकासगंगा अविरत सुरू राहील, असा विश्वासही त्यांनी व्यक्त केला.
हेमंत गौरकार सरपंच, खांदला गाव, संचालक कृषी उत्पन्न बाजार समिती वणी…
