सिटी हब मिडिया वणी…
नगर परिषद वणीमध्ये स्थायी समिती व विविध समित्यांच्या सभापतींची निवड पूर्ण झाल्यानंतर आता नगरसेवक प्रत्यक्ष जमिनीवर उतरून कामाला लागल्याचे चित्र दिसत आहे. स्वागत समारंभ व निवडणुकीतील विजयाचा उत्साह ओसरल्यानंतर जनतेच्या दैनंदिन समस्या सोडवण्यावर भर दिला जात असून त्याच अनुषंगाने प्रभाग क्रमांक २ मध्ये विकासकामांना सुरुवात झाली आहे.
प्रभाग क्रमांक २ मधील नागरी समस्यांबाबत नगरसेविका सौ. रिता महेश पहापळे यांनी नगर परिषद अध्यक्ष व मुख्याधिकारी यांच्याकडे सविस्तर निवेदन सादर करून सांडपाणी, स्वच्छता आणि पाणीपुरवठ्याशी संबंधित प्रश्न मांडले होते. या निवेदनाची दखल घेत बांधकाम समितीचे सभापती लवलेश लाल यांनी प्रभाग क्रमांक २ ला प्रत्यक्ष भेट देत नालीच्या प्रस्तावित बांधकामाची पाहणी केली.
रवि निखाडे ते सुनील मोहितकर यांच्या घरापर्यंत सांडपाणी वाहून नेण्यासाठी अंडरग्राऊंड नालीच्या बांधकामाबाबत जागेवरच पाहणी करून आवश्यक दिशा-निर्देश देण्यात आले. या पाहणीनंतर संबंधित ठिकाणी कामाला सुरुवात करण्यात आल्याने नागरिकांमध्ये समाधान व्यक्त होत आहे.
यासोबतच प्रगती नगर परिसरातील पाण्याच्या टाकीजवळील बंद असलेले जलशुद्धीकरण केंद्र, ओपन स्पेसमधील साचलेला कचरा व झाडझुडपांची साफसफाई तसेच ओपन जिम परिसरातील स्वच्छता व बसण्याच्या सुविधांबाबतही पुढील टप्प्यात कार्यवाही होण्याची अपेक्षा आहे.
कुणबी समाजात सक्रिय सहभाग असणारे महेश पहापळे यांच्या पत्नी असलेल्या नगरसेविका रिता महेश पहापळे या केवळ निवेदनापुरते मर्यादित न राहता प्रशासनाशी समन्वय साधत प्रत्यक्ष विकासकामांसाठी पाठपुरावा करत असल्याचे दिसून येत आहे. प्रभाग क्रमांक २ मधील नागरी सुविधा सुधारण्यासाठी सुरू झालेल्या या कामांमुळे येत्या काळात नागरिकांच्या समस्या मार्गी लागतील, असा विश्वास व्यक्त केला जात आहे.
