सुनिल तुगनायत, सिटी हब मिडिया वणी…
वेकोलीच्या कोलगाव विस्तार प्रकल्पग्रस्तांचा रोजगारासाठी आंदोलनाचा इशारा; ९ जुलैपासून ‘रास्ता रोको’…
वेस्टर्न कोलफिल्ड्स लिमिटेड (वेकोली) अंतर्गत येणाऱ्या कोलगाव विस्तार प्रकल्पासाठी आपल्या जमिनी देणाऱ्या प्रकल्पग्रस्त शेतकऱ्यांनी आता रोजगाराच्या हक्कासाठी तीव्र आंदोलनाचा पवित्रा घेतला आहे. जमिनीचा ताबा घेऊनही वेकोली प्रशासनाने अद्याप धोरणानुसार रोजगार उपलब्ध करून न दिल्यामुळे, येत्या ९ जुलै २०२६ पासून कोलगाव चेकपोस्ट येथे ‘रास्ता रोको’ आंदोलन करण्याचा इशारा प्रकल्पग्रस्तांनी दिला आहे. यासंदर्भात यवतमाळच्या जिल्हाधिकाऱ्यांना वणीच्या उपविभागीय अधिकाऱ्यांमार्फत (महसूल विभाग) एक मागणीचे निवेदन सादर करण्यात आले आहे.
कोलगाव, ठिखली आणि टाकळी परिसरातील सुमारे १२७ हेक्टर जमीन वेकोली प्रशासनाने कोलगाव प्रकल्प विस्तारासाठी अधिग्रहित केली आहे. वेकोलीच्या अधिकृत नियमांनुसार, प्रकल्पग्रस्तांना जमिनीचा आर्थिक मोबदला देण्यासोबतच त्यांचे पुनर्वसन करणे आणि प्रत्येक २ एकर जमिनीच्या बदल्यात कुटुंबातील एका सदस्याला रोजगार देणे बंधनकारक आहे. प्रशासनाने जमिनीचा आर्थिक मोबदला देऊन चालू २०२६ च्या हंगामापासून या शेतजमिनी संपूर्णपणे आपल्या ताब्यात घेतल्या आहेत. परिणामी, स्थानिक शेतकऱ्यांना या शेतांमध्ये पेरणी किंवा कोणतीही शेती कामे करता येत नसल्याने त्यांच्यासमोरील उपजीविकेचे साधन पूर्णपणे बंद झाले आहे.
“जमिनी गेल्यामुळे आमचे उत्पन्नाचे एकमेव साधन हिरावून घेतले गेले आहे. वेकोलीच्या बेजबाबदार आणि दिरंगाईच्या धोरणामुळे आमच्या कुटुंबांवर आर्थिक संकट कोसळले आहे,” अशी खंत प्रकल्पग्रस्त शेतकऱ्यांनी व्यक्त केली आहे. रोजगाराच्या मंजुरीसाठी होत असलेल्या विलंबाकडे प्रशासनाचे लक्ष वेधण्यासाठी अखेर शेतकऱ्यांनी लोकशाही मार्गाने संघर्ष करण्याचा निर्णय घेतला आहे.
या निवेदनाच्या प्रती आमदार सुधीरभाऊ मुनगंटीवार, माजी आमदार संजीवरेड्डी बोदकुरवार, वेकोलीचे महाप्रबंधक आणि स्थानिक पोलीस प्रशासनालाही पाठवण्यात आल्या आहेत. जर प्रशासनाने तातडीने यावर निर्णय घेतला नाही, तर ९ जुलैपासून होणाऱ्या रास्ता रोको आंदोलनादरम्यान उद्भवणाऱ्या कोणत्याही परिस्थितीला वेकोली आणि स्थानिक प्रशासनच पूर्णपणे जबाबदार राहील, असा इशारा देण्यात आला आहे.
