सुनिल तुगनायत सिटी हब मिडिया वणी…
शहरातील वाढत्या अमली पदार्थांच्या विळख्याविरोधात वणी पोलिसांनी प्रतिबंधात्मक कारवाई सुरू केली आहे. याच मोहिमेचा भाग म्हणून शुक्रवारी रात्री पोलिसांनी एका संशयित तस्कराला ताब्यात घेऊन त्याच्याकडून ३७५ ग्रॅम गांजा जप्त केला. या कारवाईमुळे अवैध अमली पदार्थांच्या व्यवसायात गुंतलेल्या घटकांमध्ये खळबळ उडाली आहे.
१९ वर्षीय तरुण पोलिसांच्या ताब्यात…
मिळालेल्या माहितीनुसार, अमली पदार्थांची विक्री होत असल्याच्या गुप्त माहितीवरून पोलिसांनी शुक्रवारी रात्री सापळा रचला होता. या कारवाई दरम्यान पोलिसांनी सुजल गोहोकार (वय १९ वर्ष, रा. एकता नगर, वणी) या तरुणाला ताब्यात घेतले. त्याची झडती घेतली असता त्याच्याकडे ३७५ ग्रॅम गांजा आढळून आला. पोलिसांनी गांजा जप्त करत सुजलला अटक केली असून त्याची पुढील चौकशी सुरू आहे.
एमडी ड्रग्जनंतर आता ‘गांजा’ रडारवर!
गेल्या काही महिन्यांपासून वणी परिसरात मेफेड्रोन (एमडी) ड्रग्जविरोधात पोलिसांनी सलग कारवाया करून अनेक आरोपींना जेरबंद केले आहे. एमडी ड्रग्जनंतर आता गांजा विक्री आणि सेवन करणाऱ्यांवरही पोलिसांनी कारवाईचा बडगा उगारल्याने अवैध व्यावसायिकांचे धाबे दणाणले आहेत.
व्यसनाधीनतेच्या वाढत्या जाळ्यावर नियंत्रण मिळवण्याचा प्रयत्न…
अलीकडच्या काळात तरुण वर्ग विविध प्रकारच्या नशेच्या आहारी जात असल्याचे वास्तव समोर येत आहे. एमडी सारख्या रासायनिक अमली पदार्थांपासून ते गांजापर्यंत पसरलेले हे जाळे समाजासाठी गंभीर चिंतेची बाब ठरत आहे. अशा परिस्थितीत तरुण पिढीला या व्यसनाच्या गर्तेत जाण्यापासून रोखण्यासाठी पोलिसांनी आता अवैध विक्रेत्यांवर कायदेशीर कारवाईचा वेग वाढवला आहे.
पोलिस निरीक्षक भानुदास पिदूरकर यांच्या मार्गदर्शनाखाली डी.बी. पथक प्रमुख पोलीस उपनिरीक्षक सय्यद साजिद यांच्या नेतृत्वाखाली ही मोहिम पोलिस हवालदार गजानन सावसाकडे, मारोती पाटील, नीलकमल भोसले, पोलिस अंमलदार गणेश मेश्राम, नंदकुमार पप्पलवार, मोनेश्वर खंडरे, रितेश भोयर, चालक शुभम किन्नाके, महिला पोलिस अंमलदार चेताली चेंडे तसेच इतर कर्मचाऱ्यांनी ही कारवाई यशस्वीपणे पार पाडली…
