वणी-लालगुडा मार्गावरील भीषण अपघातात एकाच कुटुंबाचा अंत — उपचारादरम्यान चिमुकली इनायाचाही मृत्यू…
वणी-लालगुडा मार्गावरील जन्नत हॉटेलजवळ काल झालेल्या भीषण अपघातानंतर संपूर्ण परिसर शोकमग्न झाला आहे. या दुर्घटनेत एकाच कुटुंबातील चार मुलींसह वडिलांचा मृत्यू झाला होता. तर गंभीर जखमी झालेली चिमुकली इनाया शारीक शेख हिचाही आज उपचारादरम्यान मृत्यू झाला.
मिळालेल्या माहितीनुसार, लालपुलिया परिसरातील रियाजभाई मिस्त्री (वय ५५) हे आपल्या मुलगी लियाबा (वय २०) हिला कार चालवण्याचे प्रशिक्षण देत होते. त्यांच्या सोबत मुली मायरा आणि अमिरा तसेच लहान भावाची चार वर्षांची मुलगी इनाया हीसुद्धा कारमध्ये होती. कार (MH01-AH-5700) चालवताना टर्न घेत असताना समोरून येणाऱ्या ट्रकने जोरदार धडक दिली.
या भीषण अपघातात लियाबा, मायरा आणि अमिरा यांचा जागीच मृत्यू झाला. आपल्या मुलींचा मृतदेह पाहून रियाजभाई मिस्त्री यांना हृदयविकाराचा झटका आला आणि त्यांचाही दुःखद मृत्यू झाला.
चिमुकली इनाया गंभीर जखमी अवस्थेत होती. तिला वणी येथून प्रथम चंद्रपूर येथे, नंतर उपचारासाठी नागपूर येथील एम्स रुग्णालयात हलविण्यात आले. मात्र उपचारांना प्रतिसाद न मिळाल्याने शुक्रवारी रात्री इनायाचाही मृत्यू झाला.
आज संध्याकाळी इनायावर स्थानिक कब्रस्तानात शोकाकुल वातावरणात अंत्यसंस्कार करण्यात येणार आहेत. काल रियाजभाई आणि त्यांच्या तीन मुलींच्या अंत्यसंस्कारावेळीही परिसरात हळहळ व्यक्त करण्यात आली होती. त्या वेळी मोठ्या संख्येने नागरिक, सामाजिक कार्यकर्ते आणि प्रशासनाचे अधिकारी उपस्थित होते.
ही दुर्घटना वणी शहरातील अलीकडच्या काळातील सर्वांत वेदनादायी घटना ठरत असून, एकाच कुटुंबावर ओढवलेला हा अनर्थ सर्वांच्या मनाला चटका लावणारा आहे.
📍City Hub Media
