सुनिल तुगनायत, सिटी हब मिडिया वणी…
महाराष्ट्राच्या पारंपरिक ढोल-ताशा संस्कृतीचा भव्य नाद रविवारी नागपूरच्या रेशीमबाग मैदानावर घुमणार आहे. जनमंथन फाउंडेशनच्या वतीने ‘मंथन 4 युवा – नागपूर 2026’ अंतर्गत आयोजित करण्यात आलेल्या या विशेष कार्यक्रमात तब्बल ४५०० वादक एकाच व्यासपीठावर एकत्र येणार आहेत.
या महासोहळ्याला मुख्यमंत्री देवेंद्रजी फडणवीस यांची विशेष उपस्थिती राहणार असल्याने कार्यक्रमाची उत्सुकता अधिक वाढली आहे. महाराष्ट्राच्या विविध भागांतून सहभागी होणाऱ्या ढोल-ताशा पथकांच्या सामूहिक सादरीकरणातून राज्याची लोककला, परंपरा आणि युवा शक्तीचा अनोखा संगम अनुभवता येणार आहे.
या कार्यक्रमात वणीच्या छत्रपती ढोल-ताशा पथकाचाही दमदार सहभाग असणार आहे. पथक प्रमुख दिपक पाऊणकर यांच्या मार्गदर्शनाखाली वणीतील तब्बल ६० वादक नागपूरकडे रवाना होणार असून, महासोहळ्यात ते आपल्या ताल-वाद्यांच्या माध्यमातून वणीची सांस्कृतिक ओळख अधोरेखित करणार आहेत.
रविवार, २३ ऑगस्ट २०२६ रोजी सकाळी ९ वाजता रेशीमबाग मैदानावर हा कार्यक्रम होणार आहे. हजारो वादकांचा एकत्रित ताल, भगव्या ध्वजांची दिमाखदार उपस्थिती आणि पारंपरिक वाद्यांचा गजर यामुळे नागपूरमध्ये भव्य सांस्कृतिक वातावरण निर्माण होण्याची शक्यता आहे.
वणीच्या ६० वादकांचा या ऐतिहासिक स्वरूपाच्या उपक्रमातील सहभाग हा वणीकरांसाठीही अभिमानाचा क्षण ठरणार आहे. महाराष्ट्राच्या पारंपरिक कलेला युवा पिढीच्या माध्यमातून नवी ऊर्जा देणारा हा महासोहळा पाहण्यासाठी नागरिकांमध्ये मोठी उत्सुकता आहे.
