सुनिल तुगनायत, सिटी हब मिडिया वणी…
शहरातील नामांकित ‘मॅकरून स्टुडंट्स ॲकॅडमी अँड ज्युनिअर सायन्स कॉलेज’च्या कारभारावर गंभीर संशयाचे ढग निर्माण झाले आहेत. संस्थेकडे असलेल्या एकाच UDISE नोंदणी क्रमांकाचा आधार घेऊन वेगवेगळ्या ठिकाणी बेकायदेशीरपणे वर्ग भरवले जात असल्याचा धक्कादायक आरोप समोर आला असून, शिक्षण विभागाने केवळ कागदी घोडे न नाचवता प्रत्यक्ष घटनास्थळी जाऊन ‘ऑन-द-स्पॉट’ पंचनामा करावा, असा खणखणीत पवित्रा लढा संघटनेने घेतला आहे. संघटनेचे प्रवीण खानझोडे यांनी या प्रकरणी शिक्षण प्रशासनाला सविस्तर निवेदन देऊन तातडीने कारवाईचे निर्देश देण्याची विनंती केली आहे.
संस्थेच्या वडगाव मार्गावरील संकुलासाठी नोंदणीकृत असलेला UDISE क्रमांक इतरत्र चालणाऱ्या उपक्रमांसाठीही सर्रास वापरला जात असल्याची माहिती पुढे येत आहे. या पार्श्वभूमीवर केवळ टेबल रिपोर्टवर विश्वास न ठेवता जमिनीवर जाऊन प्रत्यक्ष खातरजमा करणे अत्यावश्यक बनले आहे.
तपासणीसाठी उपस्थित केलेले कळीचे मुद्दे:
कागदी अहवालांची सत्यता पडताळा: शिक्षण अधिकाऱ्यांनी प्रत्यक्ष भेटी देऊन वस्तुस्थिती तपासली आहे का, की केवळ कार्यालयात बसून सोयीस्कर अहवाल तयार केले गेले?
जागा बदलाचे नियम धाब्यावर?: संस्थेने स्थलांतर केले असल्यास जुन्या संकुलात अद्याप वर्ग सुरू ठेवण्यासाठी आवश्यक कायदेशीर मंजुरी घेतली आहे का?
परवानग्यांचा अभाव: विविध ठिकाणी सुरू असलेल्या शाखा आणि इमारतींसाठी नगर परिषद व शिक्षण खात्याची अधिकृत परवानगी आहे का?
शासकीय लाभांचा गैरवापर?: एकाच नोंदणी क्रमांकावर (UDISE) विविध ठिकाणची पटसंख्या एकत्र दाखवून शासनाकडून निधी, अनुदान किंवा अन्य सवलती लाटल्या गेल्या आहेत का?
विद्यार्थ्यांच्या शैक्षणिक भवितव्याशी आणि प्रशासकीय पारदर्शकतेशी निगडित हा संवेदनशील विषय असल्याने या गैरप्रकारांची पाळेमुळे खणून काढणे गरजेचे असल्याचे निवेदनात म्हटले आहे. चौकशीदरम्यान किंचितही अनियमितता किंवा फसवणूक निष्पन्न झाल्यास संस्थाचालकांसह दोषींवर थेट दंडात्मक व फौजदारी गुन्हे दाखल करावेत, असा इशारा देण्यात आला आहे.
सदर तक्रारीच्या प्रती प्राथमिक शिक्षण संचालक, अमरावती विभागीय शिक्षण उपसंचालक, यवतमाळ जिल्हाधिकारी, जिल्हा परिषद प्रशासन, वणी नगर परिषद व पंचायत समितीच्या शिक्षण विभागाकडे पुढील कारवाईसाठी पाठवण्यात आल्या आहेत.
“हा विद्यार्थ्यांच्या भविष्याचा आणि सरकारी नियमांच्या काटेकोर पालनाचा विषय आहे. अधिकाऱ्यांनी केवळ कागदोपत्री औपचारिक चौकशी न करता प्रत्यक्षात वर्ग कुठे, कसे आणि कोणाच्या मंजुरीने भरवले जात आहेत याचा पंचनामा करावा. नियमांचे उल्लंघन आढळल्यास संबंधितांवर कठोरात कठोर कायदेशीर बडगा उगारलाच पाहिजे.”— प्रवीण खानझोडे (लढा संघटना, वणी)
