सुनिल तुगनायत, सिटी हब मिडिया वणी…
भटक्या कुत्र्याच्या शोधमोहीमेदरम्यान पाळीव जर्मन शेफर्डचा मृत्यू; नगरपरिषद कर्मचाऱ्याविरुद्ध तक्रार…(बातमीत एआई इमेज वापरली आहे…)
विठ्ठलवाडी परिसरात चिमुकलीवर भटक्या कुत्र्याने केलेल्या हल्ल्यानंतर सुरू असलेल्या शोधमोहीमेदरम्यान एका पाळीव जर्मन शेफर्ड कुत्र्याचा मृत्यू झाल्याची घटना समोर आली आहे. या प्रकरणी कुत्र्याचे मालक अनिल रामदास ढगे यांनी वणी पोलीस ठाण्यात तक्रार दाखल केली असून, नगरपरिषद कर्मचारी अमित ताराचंद यांच्याविरुद्ध कारवाईची मागणी केली आहे.
दोन दिवसांपूर्वी विठ्ठलवाडी परिसरात एका भटक्या कुत्र्याने चिमुकलीवर हल्ला केला होता. या हल्ल्यात तिच्या गालाला गंभीर दुखापत झाली असून, तिच्यावर नागपूर येथे उपचार सुरू आहेत. या घटनेनंतर परिसरातील मोकाट कुत्र्यांचा प्रश्न ऐरणीवर आला. नागरिकांमध्ये भीतीचे वातावरण निर्माण झाल्यानंतर नगरपरिषद प्रशासनाकडून संशयित कुत्र्यांचा शोध घेण्याची मोहीम सुरू करण्यात आली.याच मोहिमेदरम्यान २७ सप्टेंबरच्या रात्री अनिल ढगे यांचा नऊ वर्षांचा पाळीव जर्मन शेफर्ड घराबाहेर होता. काही मुलांनी एका व्यक्तीकडून कुत्र्याला मारहाण होत असल्याची माहिती ढगे यांना दिली. माहिती मिळताच ते घटनास्थळी पोहोचले.
ढगे यांनी पोलिसांकडे दिलेल्या तक्रारीनुसार, त्यावेळी एक व्यक्ती त्यांच्या कुत्र्याला मारहाण करताना दिसला. त्यांनी आरडाओरड केल्यानंतर संबंधित व्यक्ती आणि त्याच्यासोबत असलेले काही जण तेथून निघून गेले. यातील नगरपरिषद कर्मचारी अमित ताराचंद यांना आपण ओळखले असल्याचे ढगे यांनी तक्रारीत नमूद केले आहे.
मारहाणीच्या घटनेत कुत्र्याच्या डोक्याला गंभीर दुखापत झाली होती. त्यातून रक्तस्त्राव होत असल्याने त्याला तातडीने पशुवैद्यकीय उपचारासाठी नेण्यात आले. उपचार सुरू असतानाच पहाटे सुमारे चार वाजता त्याचा मृत्यू झाला.
नऊ वर्षांपासून हा जर्मन शेफर्ड ढगे कुटुंबासोबत राहत होता. कुटुंबीयांनी त्याला केवळ पाळीव प्राणी म्हणून नव्हे, तर घरातील एका सदस्याप्रमाणे आणि मुलाप्रमाणे जपले होते. त्याच्याशी कुटुंबातील प्रत्येकाची भावनिक नाळ जोडली गेली होती. त्यामुळे त्याचा अचानक आणि दुर्दैवी मृत्यू झाल्याने ढगे कुटुंबीय शोकाकुल झाले आहेत. आपल्या कुटुंबातील एका सदस्याला अशा प्रकारे गमावण्याची वेळ येणे, ही त्यांच्यासाठी अत्यंत दुःखद आणि क्लेशदायक घटना ठरली आहे.दरम्यान, चिमुकलीवर हल्ला करणाऱ्या भटक्या कुत्र्याचा शोध सुरू असताना पाळीव जर्मन शेफर्डवर मारहाण झाल्याचा आरोप करण्यात आल्याने या घटनेबाबत प्रश्न उपस्थित झाले आहेत. नेमका हल्लेखोर कुत्रा कोणता होता, पाळीव कुत्र्याची ओळख कशी करण्यात आली आणि त्याच्यावर मारहाण का करण्यात आली, याबाबत आता पोलिसांकडून तपास केला जात आहे.
वणी पोलिसांनी ढगे यांच्या तक्रारीची नोंद घेतली असून, कुत्र्याच्या मृत्यूचे नेमके कारण, त्याला झालेल्या दुखापतीची पार्श्वभूमी, मारहाणीची घटना आणि त्यामध्ये सहभागी असलेल्या व्यक्तींची भूमिका याचा तपास सुरू केला आहे. पोलिसांच्या तपासानंतर या प्रकरणातील नेमकी वस्तुस्थिती स्पष्ट होणार आहे.
