सिटी हब मिडिया वणी…
नगरपरिषद निवडणुकीची रणधुमाळी दिवसेंदिवस रंगात येत असताना वणीमध्ये भारतीय जनता पक्षाने आक्रमक प्रचाराला सुरुवात केली आहे. कमळ फुलवण्यासाठी भाजपचे ज्येष्ठ नेते माजी आमदार संजीव रेड्डी बोदकुरवार, माजी नगराध्यक्ष तारेंद्र बोर्डे आणि शहराध्यक्ष निलेश चौधरी यांच्या नेतृत्वात भाजपची संपूर्ण टीम गल्लोगल्ली, घराघरातून मतदारांशी थेट संवाद साधत आहे. प्रचाराचे दिवस कमी असल्याने भाजपने आपल्या मोहिमेची गती आणखी वाढवली आहे.
भाजपचे सर्व प्रमुख नेते अक्षरशः पायात भिंगरी झाल्यासारखे वणीच्या प्रत्येक वॉर्डातील प्रत्येक गल्ल्यांत फिरत आहेत. मतदारांशी थेट संवाद साधून “विकासाला मत द्या, भाजपला मत द्या” असा संदेश ते देत आहेत.केद्रांत प्रधानमंत्री नरेंद्र मोदी, राज्यात मुख्यमंत्री देवेंद्र फडणवीस आणि स्थानिक पातळीवर वणी नगरपरिषदेवर भाजप सत्तेत आली तर ट्रिपल इंजिन सरकार वणीचा विकास वेगाने रुळावर आणेल, असा ठाम विश्वास भाजप नेते मतदारांना देत आहेत.
भाजपच्या कार्यकाळात झालेली विकासकामे, मूलभूत सुविधांतील सुधारणा आणि प्रशासनातील बदल यांची उजळणी करत भाजपचे माजी आमदार संजीव रेड्डी बोदकुरवार स्वतः लोकांपर्यंत पोहोचत आहेत. “वणीचा सर्वांगीण विकास केवळ भाजपच करू शकते,” असा ठाम संदेश देत ते विकासाचीच भाषा मांडत आहेत.
भाजपच्या या डोअर-टू-डोअर मोहिमेला सर्व प्रभागांमध्ये उल्लेखनीय असा नागरिकांचा प्रतिसाद मिळत असून अनेक ठिकाणी पक्षाला उत्स्फूर्त साथ मिळत आहे. प्रभागातील भाजपचे उमेदवारही घराघरात जाऊन मतांची जोडी समोर करत आहेत, तर मतदारही त्यांच्या मागणीला सकारात्मक प्रतिसाद देत असल्याचे चित्र दिसून येत आहे.
यामुळेच मागील सत्तेपेक्षाही मोठा बहुमत भाजप यंदा मिळवेल, असा दावा भाजप नेते आत्मविश्वासाने करत आहेत. मतभेद आणि मनभेद विसरून सर्व नेते एका ध्येयाने—नगरपालिकेवर भगवा झेंडा फडकवण्याच्या—तयारीत जुटले आहेत.
सध्या निवडणूक प्रचारात भाजप इतर पक्षांपेक्षा पुढे असल्याचे वातावरण वणीभर जाणवत असून, आक्रमक शैलीतील हा प्रचार पुढील दिवसांत आणखी तापणार असल्याची चिन्हे स्पष्टपणे दिसत आहेत.
