सिटी हब मिडिया वणी…वणी
वणी विधानसभा क्षेत्राचे माजी आमदार तथा ज्येष्ठ शिवसेना नेते विश्वास नांदेकर यांचे मुंबई येथील लीलावती हॉस्पिटलमध्ये उपचारादरम्यान दुःखद निधन झाले होते. त्यांच्या निधनानंतर त्यांचे पार्थिव मुंबईहून वणी येथे आणण्यात आले. वणीतील त्यांच्या निवासस्थानी पार्थिव अंत्यदर्शनासाठी ठेवण्यात आले असता हजारो नागरिकांनी श्रद्धांजली अर्पण करत अखेरचे दर्शन घेतले.
यानंतर त्यांचे पार्थिव वणी येथून त्यांच्या मूळ गावी कायर पठारपूर येथे नेण्यात आले. पठारपूर येथील त्यांच्या राहत्या घरी पारंपरिक धार्मिक विधी पार पाडल्यानंतर पूर्ण शासकीय प्रोटोकॉलनुसार त्यांच्यावर अंत्यसंस्कार करण्यात आले. त्यांच्या पुतण्याने त्यांना मुखाग्नी दिला. अंत्ययात्रेदरम्यान वणी शहरासह संपूर्ण वणी विधानसभा क्षेत्रातील नागरिक रस्त्याच्या दुतर्फा उभे राहून त्यांना अखेरची श्रद्धांजली अर्पण करत होते. या वेळी संपूर्ण परिसर शोकमग्न झाला होता.
या अंत्यसंस्कार प्रसंगी पालकमंत्री संजय राठोड, माजी केंद्रीय गृहराज्यमंत्री हंसराज अहीर, खासदार प्रतिभाताई धानोरकर, आमदार संजय देरकर, माजी आमदार संजीव रेड्डी बोदकुरवार, मनसेचे पक्षनेते राजू उंबरकर, काँग्रेस प्रदेश सचिव संजय खाडे तसेच शिवसेनेचे संघटक मंत्री विजय चोरडिया यांच्यासह विविध राजकीय पक्षांचे पदाधिकारी, प्रशासकीय अधिकारी, कार्यकर्ते, समर्थक आणि गावातील हजारो नागरिक उपस्थित होते.
विश्वास नांदेकर यांचा मोठा चाहता वर्ग होता. “शिवसेनेचा ढाण्या वाघ हरपला”, “कार्यकर्त्यांचा आधारस्तंभ निखळला” अशा शब्दांत सर्वसामान्य जनता, कार्यकर्ते व समर्थकांनी आपल्या भावना व्यक्त केल्या. समर्थकांसाठी ते प्रेरणास्थान होते, तर वणीच्या राजकारणात त्यांनी स्वतंत्र व ठळक ओळख निर्माण केली होती. त्यांच्या जाण्याने वणीच्या राजकारणात कधीही न भरून येणारी मोठी पोकळी निर्माण झाली आहे, अशी भावना सर्वत्र व्यक्त होत आहे.
सिटी हब मिडिया वणी…
