सुनिल तुगनायत सिटी हब मिडिया वणी…
विदर्भातील पर्यटकांसाठी आणि कोकणात जाणाऱ्या प्रवाशांसाठी रेल्वे प्रशासनाने दिलासादायक बातमी दिली आहे. नागपूर ते मडगाव दरम्यान चालवली जाणारी विशेष ट्रेन (०११३९/०११४०) आता नियमित करण्यात आली असून, तिला नवीन क्रमांक ११२०३/११२०४ बहाल करण्यात आला आहे. ही रेल्वे सेवा आठवड्यातून दोनदा उपलब्ध असेल.
गाडीचे वेळापत्रक:
११२०३ नागपूर – मडगाव एक्सप्रेस: नागपूरहून दर बुधवार आणि शनिवारी दुपारी ३:०५ वाजता सुटेल आणि दुसऱ्या दिवशी संध्याकाळी ५:४५ वाजता मडगावला पोहोचेल.
११२०४ मडगाव – नागपूर एक्सप्रेस: मडगावहून दर शुक्रवार आणि सोमवारी रात्री ९:२५ वाजता सुटेल आणि दुसऱ्या दिवशी रात्री ८:२५ वाजता नागपूरला पोहोचेल.
महत्त्वाचे थांबे:
ही ट्रेन वर्धा, अकोला, शेगाव, भुसावळ, नाशिक रोड, इगतपुरी, कल्याण, पनवेल, रोहा, चिपळूण, रत्नागिरी, कणकवली आणि सावंतवाडी रोड यांसारख्या महत्त्वाच्या स्थानकांवर थांबेल.
गाडीची रचना:
या रेल्वेला एकूण २४ कोच असतील, ज्यामध्ये ११ स्लीपर, ५ एसी ३-टियर, १ एसी २-टियर आणि ५ जनरल कोचचा समावेश आहे.
या रेल्वेच्या नियमितीकरणामुळे इगतपुरी-भुसावळ मेमू (११११९) च्या वेळेतही थोडा बदल करण्यात आला असून, ती आता इगतपुरीवरून ५ मिनिटे लवकर म्हणजेच सकाळी ९:५० वाजता सुटेल.
