सुनिल तुगनायत, सिटी हब मिडिया वणी…
शहरातील प्रभाग क्रमांक २ मध्ये समाविष्ट असलेल्या प्रगतीनगर आणि बजरंग नगर परिसरातील नागरिक सध्या विस्कळीत वीज पुरवठ्यामुळे कमालीचे त्रस्त झाले आहेत. या भागात सातत्याने कमी दाबाने (लो-व्होल्टेज) वीज पुरवठा होत असल्याने घरगुती उपकरणांचा वापर करताना स्थानिक रहिवाशांना मोठ्या अडचणींना तोंड द्यावे लागत आहे.
सध्या अस्तित्वात असलेल्या डी.पी.वर (रोहित्र) परिसराचा अतिरिक्त भार वाढल्यामुळे वारंवार वीज खंडित होणे आणि पुरवठ्यात तांत्रिक बिघाड होणे असे प्रकार रोजचेच झाले आहेत. या कायमस्वरूपी समस्येतून मार्ग काढण्यासाठी महावितरणच्या वणी शहर सहाय्यक अभियंत्यांना एक विशेष निवेदन सादर करण्यात आले. या निवेदनाद्वारे संबंधित भागात तातडीने नवीन डी.पी. मंजूर करून ती कार्यान्वित करण्याची आग्रही मागणी करण्यात आली आहे.
नागरिकांच्या या समस्येची दखल घेत, ‘निरंतर वीज योजना’ अंतर्गत या परिसरात लवकरच नवीन रोहित्र बसवून दिले जाईल, अशी ग्वाही महावितरणच्या अधिकाऱ्यांनी यावेळी शिष्टमंडळाला दिली.
लोकप्रतिनिधी आणि पदाधिकाऱ्यांची उपस्थिती…
प्रशासनाला निवेदन देताना खालील मान्यवर उपस्थित होते:
सौ. रिताताई पहापळे (नगरसेविका, भाजप)
आशिष डंभारे (सरचिटणीस, भाजप वणी शहर)
गणेश असुटकर (उपाध्यक्ष, भाजप)
महेश पहापळे
देशपांडे सर
नागरिकांची अपेक्षा: प्रगतीनगर आणि बजरंग नगर भागातील जनतेला पुरेसा आणि योग्य दाबाने वीज पुरवठा मिळणे अत्यंत गरजेचे आहे. त्यामुळे महावितरण प्रशासनाने केवळ आश्वासन न देता यावर लवकरात लवकर प्रत्यक्ष कार्यवाही करावी, अशी अपेक्षा नागरिकांकडून व्यक्त केली जात आहे.
