सुनिल तुगनायत, सिटी हब मिडिया वणी…
बनावट सातबारा आणि बोगस फेरफारच्या साहाय्याने लाखो रुपयांना गंडा घालणाऱ्या वडगाव (धं) येथील जमीन घोटाळ्यातील मुख्य आरोपी सतीश केराम याला वणी पोलिसांनी बेड्या ठोकल्या आहेत. या प्रकरणातील त्याचा साथीदार शैलेश वाकडे हा अजूनही पोलिसांना गुंगारा देत असून, पोलीस त्याचा कसून शोध घेत आहेत. दरम्यान, या प्रकरणात नाव अडकलेल्या महसूल विभागाच्या दोन अधिकाऱ्यांना न्यायालयाने तात्पुरता दिलासा दिला आहे.
📄 काय आहे संपूर्ण प्रकरण?
सूरज रमेश चाटे नावाच्या नागरिकाने वणी पोलीस ठाण्यात या फसवणुकीबाबत रीतसर तक्रार नोंदवली होती. आरोपी शैलेश वाकडे याच्या मालकीची नसलेली जागा त्याचीच असल्याचे भासवून, त्याला महसूल विभागातील बनावट कागदपत्रे, खोटा सातबारा आणि फेरफार जोडण्यात आले होते. शासकीय अधिकाऱ्यांनीच ही कागदपत्रे खरी असल्याचा निर्वाळा दिल्यामुळे फिर्यादीचा विश्वास बसला आणि त्यांनी १,२०,००० रुपयांचा व्यवहार केला. मात्र, काही दिवसांनी ती जमीन दुसऱ्याचीच असल्याचे समजताच आपल्याला फसवण्यात आल्याचे फिर्यादीच्या लक्षात आले.
⚖️ अधिकाऱ्यांना अटकपूर्व जामीन…
या संपूर्ण रॅकेटमध्ये महसूल विभागाचे तलाठी रवींद्र उपरे आणि मंडळ अधिकारी राजू डोंगरे यांचे संगनमत असल्याचा आरोप आहे. गुन्हा दाखल होताच अटक टाळण्यासाठी या दोन्ही अधिकाऱ्यांनी पांढरकवडा सत्र न्यायालयात धाव घेतली होती. न्यायालयाने काही अटी व शर्ती घालत त्यांना अटकपूर्व जामीन मंजूर केला आहे. यामुळे सध्यातरी त्यांची अटक टळली असली, तरी त्यांच्यावरील चौकशीची टांगती तलवार कायम आहे.
🔍 रॅकेटचा पर्दाफाश होण्याची शक्यता…
पोलिसांनी मुख्य सूत्रधार सतीश केराम, शैलेश वाकडे आणि दोन्ही महसूल अधिकाऱ्यांवर फसवणूक, बनावट दस्तऐवज तयार करणे आणि शासकीय दप्तरात फेरफार केल्याप्रकरणी गुन्हे दाखल केले आहेत. मुख्य आरोपी केरामच्या अटकेमुळे या रॅकेटची पाळेमुळे किती खोलवर रुजली आहेत, हे समोर येईल. तसेच फरार वाकडेच्या अटकेनंतर महसूल विभागातील आणखी काही संशयित चेहरे समोर येण्याची दाट शक्यता वर्तवली जात आहे.
