सुनिल तुगनायत, सिटी हब मिडिया वणी…
अपघातात प्राण गमावलेल्या एका व्यक्तीचा गहाळ झालेला महागडा मोबाईल शोधण्यात वणी पोलिसांना यश आले आहे. सायबर सेल आणि ‘CEIR’ (सेंट्रल इक्विपमेंट आयडेंटिटी रजिस्टर) पोर्टलच्या प्रभावी वापरामुळे हा फोन ट्रॅक करण्यात आला. पोलिसांनच्या या कामगिरीमुळे मृत व्यक्तीची शेवटची आठवण त्यांच्या कुटुंबाला सुखरूप परत मिळाली आहे.
नेमकी घटना काय होती?
काही दिवसांपूर्वी वणी येथील जन्नत होटलच्या परिसरात एक भीषण कार अपघात झाला होता. या अपघातात भीमनगर भागात राहणारे मॅकेनिक रियाजुद्दीन शेख यांचा दुर्दैवी मृत्यू झाला. अपघात झाला त्या गोंधळाच्या परिस्थितीत रियाजुद्दीन यांच्या जवळील किमती मोबाईल फोन घटनास्थळावरून गहाळ झाला होता.
भावाच्या मृत्यूनंतर शाकीर उद्दीन रफी उद्दीन यांनी वणी पोलीस ठाण्यात मोबाईल हरविल्याची तक्रार नोंदवली. या तक्रारीच्या आधारे पोलिसात मिसिंग नोंद क्र. ६९७/२५ अन्वये गुन्हा दाखल करण्यात आला होता.
असा लागला मोबाईलचा छडा…
तांत्रिक कौशल्याचा यशस्वी वापर:
केस दाखल होताच वणी पोलीस स्टेशनच्या CEIR पोर्टल हँडलर महिला पोलीस अंमलदार (LPC) ब.नं. ४९३ छाया उमरे यांनी तातडीने हालचाली सुरू केल्या. त्यांनी हरवलेल्या मोबाईलचे डिटेल्स केंद्र सरकारच्या ऑनलाईन ‘CEIR’ पोर्टलवर ब्लॉक आणि ट्रेसिंगसाठी नोंदवले.
काही दिवसांतच हा मोबाईल सक्रिय होताच पोर्टलवर त्याचा माग लागला. तांत्रिक माहितीच्या आधारे पोलिसांनी मोबाईलचा अचूक लोकेशन शोधून तो जप्त केला.
पोलिसांचे मानले आभार…
आज दिनांक २५ मे २०२६ रोजी पोलीस निरीक्षकांच्या मार्गदर्शनाखाली शाकीर उद्दीन रफी उद्दीन यांना पोलीस ठाण्यात बोलावण्यात आले आणि कायदेशीर प्रक्रिया पूर्ण करून त्यांचा मोबाईल सुपूर्द करण्यात आला.
आपल्या दिवंगत भावाची शेवटची आठवण आणि त्यातील वैयक्तिक डेटा सुरक्षित परत मिळाल्यामुळे भावूक झालेल्या शाकीर उद्दीन यांनी वणी पोलीस प्रशासन आणि महिला पोलीस अंमलदार छाया उमरे यांच्या तत्परतेबद्दल कृतज्ञता व्यक्त केली आहे.
