सुनिल तुगनायत, सिटी हब मिडिया वणी…
बँकेतून मोठी रक्कम काढून निघालेल्या एका व्यक्तीचे लक्ष विचलित करून, दुचाकीवर ठेवलेली ५० हजार रुपयांची रोकड चोरट्यांनी पळवल्याची खळबळजनक घटना वणी शहरात घडली आहे. हा प्रकार आज सकाळी ११ वाजेच्या सुमारास गजबजलेल्या गांधी चौक भागात दिवसाढवळ्या घडला.
नेमके काय घडले?
लालगुडा येथील रहिवासी शंकर धोटे हे काही कामासाठी वणी येथील स्टेट बँक ऑफ इंडिया (SBI) च्या शाखेत आले होते. त्यांनी बँकेतून ५० हजार रुपयांची नगद रक्कम काढली आणि ती एका पिशवीत भरली. त्यानंतर ही पिशवी आपल्या दुचाकीच्या हँडलला अडकवून ते बाजारपेठेकडे निघाले. मात्र, बँकेपासूनच काही अज्ञात चोरटे त्यांच्या मागावर होते.
अंगावर घाण टाकून साधली संधी…
गांधी चौकातील देवडे किराणा दुकानाजवळ पोहोचले असता, चोरट्यांनी धोटे यांचे लक्ष विचलित करण्यासाठी एक जुनी युक्ती वापरली. त्यांनी धोटे यांच्या अंगावर (शर्टवर) काहीतरी घाण टाकली. अंगावर घाण पडल्याचे लक्षात येताच धोटे यांनी आपली दुचाकी थांबवली आणि ते शर्ट स्वच्छ करू लागले. धोटे यांचे लक्ष विचलित झाल्याची सुवर्णसंधी साधत, दबा धरून बसलेल्या चोरट्याने अत्यंत चलाखीने दुचाकीच्या हँडलला टांगलेली पैशांची पिशवी काढली आणि तिथून पळ काढला.
चोरट्याची करामत सीसीटीव्हीत कैद…
शर्ट साफ केल्यानंतर धोटे यांचे दुचाकीकडे लक्ष गेले असता, पैशांची पिशवी चोरीला गेल्याचे त्यांच्या लक्षात आले. भरचौकात घडलेल्या या प्रकारामुळे परिसरात एकच खळबळ उडाली. या घटनेची माहिती मिळताच पोलिसांनी तातडीने तपास चक्र फिरवली. परिसरातील सीसीटीव्ही (CCTV) कॅमेऱ्यांचे फुटेज तपासले असता, हा संपूर्ण प्रकार कॅमेऱ्यात स्पष्टपणे कैद झाला आहे. फुटेजच्या आधारे पोलीस आता संशयित चोरट्यांचा शोध घेत आहेत.सीसीटीव्ही मध्ये चोरी करणारा अल्दपवयीन आहे असे दिसत आहे.
पोलिसांचे नागरिकांना आवाहन…
या घटनेच्या पार्श्वभूमीवर पोलिसांनी नागरिकांना पुन्हा एकदा सतर्कतेचा इशारा दिला आहे. बँकेतून किंवा इतर ठिकाणाहून मोठी रक्कम घेऊन प्रवास करताना नागरिकांनी अत्यंत सावध राहावे. वाटेत कोणी थांबवण्याचा प्रयत्न केल्यास किंवा लक्ष विचलित करण्याचा प्रकार घडल्यास आधी पैशांची सुरक्षा करावी आणि अशा वेळी थेट घरी किंवा सुरक्षित ठिकाणी जावे, असे आवाहन पोलीस प्रशासनाकडून करण्यात आले आहे.
घटनेचा सीसीटीव्ही विडिओ…
