सुनिल तुगनायत, सिटी हब मिडिया वणी…
वणीत एम.डी. ड्रग्ज रॅकेटचा पर्दाफाश; वणी पोलिसांची मोठी कारवाई, चौघांना अटक…
यवतमाळ जिल्ह्यातील अमली पदार्थांचे समूळ उच्चाटन करण्यासाठी पोलीस प्रशासनाने विशेष मोहीम हाती घेतली आहे. याच मोहिमेचा भाग म्हणून वणी पोलीस स्टेशनच्या हद्दीत एका मोठ्या एम.डी. (मेफेड्रोन) अमली पदार्थ विक्री करणाऱ्या रॅकेटचा यशस्वी उलगाडा करण्यात आला आहे. पोलिसांच्या या धडक कारवाईत एकूण १९.२७ ग्रॅम एम.डी. पावडर आणि मोबाईल फोन असा एकूण १ लाख ४९ हजार ८९० रुपयांचा मुद्देमाल जप्त करण्यात आला असून, या प्रकरणी एकूण चार आरोपींना अटक करण्यात आली आहे.
गणेशपूर रोडवर मध्यरात्री छापा यवतमाळचे पोलीस अधीक्षक कुमार चिंता यांच्या मार्गदर्शनाखाली वणी पोलिसांचे पथक शहरात गस्त घालत असताना, गोपनीय बातमीदाराकडून एक अत्यंत विश्वसनीय माहिती मिळाली. या माहितीच्या आधारे पोलिसांनी १९ जून २०२६ रोजी रात्री ९:४५ वाजताच्या सुमारास गणेशपूर रोड परिसरात सापळा रचून कायदेशीररीत्या छापा टाकला.
अंगझडतीत सापडले ड्रग्ज; आरोपींची नावे उघड या छाप्यादरम्यान पोलिसांनी संशयित आरोपी कौतुक उर्फ गोलू दिलीप मेश्राम (वय २८ वर्ष, रा. तेलीफैल, वणी) याला ताब्यात घेऊन त्याची अंगझडती घेतली. त्याच्याकडे एका प्लास्टिक पाऊचमध्ये १९.२७ ग्रॅम वजनाचा प्रतिबंधित ‘एम.डी.’ (MEPHEDRONE) हा अमली पदार्थ आढळून आला, ज्याची बाजारपेठ किंमत १ लाख ३४ हजार ८९० रुपये आहे. तसेच त्याच्याकडून १५ हजार रुपये किमतीचा एक मोबाईल जप्त करण्यात आला.
गोलू मेश्रामची सखोल चौकशी केली असता, त्याने हा माल प्रज्योत उर्फ कॉकरोच महेश उपरे (वय २७ वर्ष, रा. तेलीफैल, वणी, ह.मु. नागपूर) याच्याकडून आणल्याची कबुली दिली. या दोन्ही मुख्य आरोपींविरुद्ध वणी पोलीस ठाण्यात गुन्हा रजि. क्र. ५१४/२०२६, कलम ८(C), २१(B), २१ एन.डी.पी.एस. (NDPS) ॲक्टनुसार गुन्हा नोंदवण्यात आला आहे.
तपासात इतर तीन साथीदार गजाआड या कारवाईच्या पुढील तपासादरम्यान, एम.डी. पदार्थ विक्रीच्या आधीच्या एका गुन्ह्यात (अप क्र. ४७९/२०२६) सहभागी असलेल्या आणखी तीन आरोपींना पोलिसांनी अटक केली आहे. अटक करण्यात आलेल्या आरोपींची नावे खालीलप्रमाणे आहेत:
१) प्रज्योत महेश उपरे (वय २७ वर्ष, रा. तेलीफैल, वणी)
२) अविनाश विजय पाटील (वय ४२ वर्ष, रा. छोरिया ले-आउट, वणी)
३) रविंद्र धनराज गुप्ता (वय ३४ वर्ष, रा. रंगनाथ नगर, वणी)
नागरिकांना पोलिसांचे आवाहन वणी पोलिसांतर्फे शहरातील नागरिकांना जाहीर आवाहन करण्यात आले आहे की, परिसरात एम.डी. किंवा इतर कोणत्याही प्रकारच्या अमली पदार्थांच्या विक्री अथवा सेवनाबाबत काहीही माहिती असल्यास तात्काळ पोलिसांशी संपर्क साधावा. माहिती देणाऱ्या नागरिकांचे नाव पूर्णपणे गोपनीय ठेवण्यात येईल, अशी ग्वाही पोलिसांनी दिली आहे.
या पथकाने पाडली कामगिरी सदर धडक कारवाई यवतमाळचे पोलीस अधीक्षक कुमार चिंता, अप्पर पोलीस अधीक्षक अशोक थोरात, सहाय्यक पोलीस अधीक्षक व प्रभारी उपविभागीय पोलीस अधिकारी (पांढरकवडा/वणी) रॉबिन बन्सल, आणि वणीचे ठाणेदार (पो.नि.) भानुदास पिदुरकर यांच्या मार्गदर्शनाखाली पोउपनी साजिद सय्यद, पोउपनी सुयोग महापुरे, पोलीस अंमलदार मोनेश्वर खंडरे, नंदकुमार पोपुलवार, गणेश मेश्राम, अरविंद बुच्चे, मिथुन राऊत, श्याम राठोड आणि निलेश आडे यांनी यशस्वीरीत्या पार पाडली.
