सुनिल तुगनायत सिटी हब मिडिया…
शहरातील गांधी चौक परिसरात भरदिवसा घडलेल्या चोरीच्या घटनेमुळे खळबळ उडाली आहे. दुचाकीच्या डिकीत सुरक्षित ठेवलेली २५ हजार रुपयांची रोकड अज्ञात चोरट्याने क्षणार्धात पळविल्याची घटना समोर आली असून पोलिसांनी तपास सुरू केला आहे.
मिळालेल्या माहितीनुसार, तालुक्यातील शेलू (चारगाव) येथील शेतकरी बापूराव भोंगळे (वय ७०) हे काही कामानिमित्त वणी शहरात आले होते. त्यांनी वणी येथील भारतीय स्टेट बँकेच्या शाखेतून २५ हजार रुपयांची रक्कम काढली. त्यानंतर त्यांनी ती रक्कम आपल्या मोटारसायकलच्या डिकीत ठेवून गांधी चौक परिसरात खरेदीसाठी थांबले.
यावेळी भाजीपाला खरेदी करण्यात ते गुंतले असताना चोरट्याने संधी साधली. रस्त्याच्या कडेला उभी असलेल्या दुचाकीची डिकी उघडून त्यातील संपूर्ण रोकड अज्ञात व्यक्तीने चोरून नेली. काही वेळाने परत आल्यावर डिकीतील पैसे गायब असल्याचे लक्षात येताच भोंगळे यांना धक्का बसला.
घटनेची माहिती मिळताच त्यांनी वणी पोलीस ठाणे गाठून तक्रार नोंदविली. पोलिसांनी तत्काळ घटनास्थळ परिसरातील सीसीटीव्ही कॅमेऱ्यांचे फुटेज तपासण्यास सुरुवात केली. प्राथमिक तपासात हेल्मेट घातलेली एक संशयित व्यक्ती दुचाकीजवळ वावरताना आढळल्याचे समजते. त्या व्यक्तीचा शोध घेण्यासाठी पोलिसांनी तपासाची चक्रे वेगाने फिरविली आहेत.
दरम्यान, या प्रकारानंतर पोलिसांनी नागरिकांना सावधगिरी बाळगण्याचे आवाहन केले आहे. बँकेतून मोठी रक्कम काढल्यानंतर ती वाहनाच्या डिकीत किंवा सहज उपलब्ध ठिकाणी ठेवू नये, तसेच गर्दीच्या भागात वाहन दीर्घकाळ बेवारस सोडू नये, असे आवाहन करण्यात आले आहे.
गांधी चौकासारख्या गजबजलेल्या परिसरात घडलेल्या या चोरीमुळे नागरिकांमध्ये चिंता व्यक्त केली जात असून, चोरट्यांना तातडीने जेरबंद करण्याची मागणी होत आहे.
