सुनिल तुगनायत, सिटी हब मिडिया वणी…
**महादेव नगरीत धाडसी घरफोडी: दूध विक्रेत्याचे घर गाठत चोरट्यांनी मारला ६० हजारांचा डल्ला**
शहरातील चिखलगाव परिसरामध्ये येणाऱ्या महादेव नगरीत एका बंद घराला चोरट्यांनी लक्ष्य केले आहे. येथील ‘शिव अपार्टमेंट’मध्ये राहणाऱ्या एका दूध व्यावसायिकाच्या फ्लॅटचे कुलूप तोडून अज्ञात आरोपींनी कपाटातील सोन्याचे दागिने आणि रोख रक्कम चोरून नेली. या चोरीत एकूण ६० हजार रुपयांचा मुद्देमाल गायब झाला असून, वणी पोलिसांनी याप्रकरणी अज्ञात व्यक्तीविरुद्ध गुन्हा दाखल केला आहे.
**काम आटोपून घरी परतले अन्…**
शिव अपार्टमेंटमधील एका फ्लॅटमध्ये २९ वर्षीय सूरज विजयभान यादव हे राहतात. त्यांचा दुधाचा मुख्य व्यवसाय खडबडा मोहल्ला भागात चालतो. सूरज यांचे संपूर्ण कुटुंब (पत्नी आणि आई-वडील) गेल्या दोन महिन्यांपासून उत्तर प्रदेशातील त्यांच्या गावी गेले असल्याने ते सध्या घरात एकटेच होते. व्यवसायाच्या सोयीसाठी ते अनेकदा रात्रीच्या वेळी दुकानातच मुक्कामाला थांबायचे.
२३ जून रोजी नेहमीप्रमाणे सूरज आपल्या फ्लॅटला कुलूप लावून दुकानाकडे गेले होते. २४ जूनच्या सकाळी जेव्हा ते घरी परतले, तेव्हा त्यांना मुख्य दरवाजाचे कुलूप तुटलेले दिसले. आत जाऊन पाहिले असता कपाटाचे लॉकर उघडे होते आणि घरातील सामान अस्ताव्यस्त विखुरलेले होते. नेमके काय चोरीला गेले हे सुरुवातीला समजत नसल्याने त्यांनी चंद्रपूरहून आपल्या बहिणींना मदतीसाठी बोलावले. अखेर २५ जून रोजी गावी असलेल्या आईशी फोनवर चर्चा केल्यानंतर कपाटातील दागिने चोरीला गेल्याची खात्री झाली.
**काय काय चोरीला गेले?**
तक्रारीनुसार, चोरट्यांनी कपाटातून खालील वस्तूंवर हात साफ केला:
* सुमारे ४०,००० रुपये किमतीचा १० ग्रॅम वजनाचा सोन्याचा हार
* १५,००० रुपये किमतीचे सोन्याचे टॉप्स आणि नथ (३ ग्रॅम)
* ५,००० रुपयांची रोकड
**चौकीदार झोपला अन् चोरट्यांनी संधी साधली!**
सूरज यांनी अपार्टमेंटच्या सुरक्षारक्षकाकडे चौकशी केली असता, २४ जूनच्या पहाटे ११ ते ३ या वेळेत त्याचा डोळा लागल्याचे समोर आले. नेमक्या याच वेळेचा फायदा घेत चोरट्यांनी इमारतीत प्रवेश करून ही घरफोडी केल्याचा संशय आहे. सूरज यांची आई गावाहून परत आल्यानंतर घरातून इतर काही वस्तू चोरीला गेल्या आहेत का, हे स्पष्ट होऊ शकणार आहे. वणी पोलीस सध्या या चोरीचा तपास करत आहेत.
