सुनिल तुगनायत, सिटी हब मिडिया वणी…
विद्यार्थ्यांना शिक्षणाच्या प्रवाहात आणण्यासाठी आणि त्यांच्या उज्ज्वल भविष्यासाठी आयुष्यभर झटणाऱ्या शिक्षकाची स्मृतीही तितकीच आदर्श असावी, याचाच प्रत्यय वणी शहरात आला. दिवंगत श्री गजाननराव पहापळे (सेवानिवृत्त मुख्याध्यापक) यांच्या स्मृतिप्रीत्यर्थ, स्थानिक स्वामी विवेकानंद वाचनालय येथे स्पर्धा परीक्षेची तयारी करणाऱ्या गरजू व होतकरू विद्यार्थ्यांसाठी महत्त्वपूर्ण पुस्तकांचा संच भेट देण्याचा स्तुत्य कार्यक्रम नुकताच संपन्न झाला.
या कार्यक्रमाला वणी शहरातील अनेक मान्यवरांची प्रमुख उपस्थिती लाभली होती. यामध्ये वणी नगर परिषदेचे माजी नगराध्यक्ष श्री. पी. के. टोंगे, ज्येष्ठ सामाजिक कार्यकर्ते श्री. दिलीपभाऊ मालेकर, कुचनकर साहेब, तसेच प्रख्यात मार्गदर्शक श्री. वैभव ठाकरे सर यांची विशेष उपस्थिती होती.
पहापळे परिवाराच्या वतीने नगर परिषदेच्या महिला व बालकल्याण सभापती तथा नगरसेविका सौ. रिता पहापळे, सौ. शारदा पहापळे, श्री. राजेश पहापळे आणि श्री. महेश पहापळे प्रामुख्याने उपस्थित होते.
वाचन संस्कृती आणि स्पर्धा परीक्षेला बळ…
कार्यक्रमादरम्यान मान्यवरांनी दिवंगत गजाननराव पहापळे यांच्या शिक्षण क्षेत्रातील कार्याचा गौरव केला. “एका शिक्षकाच्या स्मृती प्रित्यर्थ विद्यार्थ्यांना ज्ञानाची शिदोरी म्हणजेच पुस्तके भेट देणे, हा अत्यंत कौतुकास्पद आणि समाजाला दिशा देणारा उपक्रम आहे. यामुळे स्पर्धा परीक्षेचा अभ्यास करणाऱ्या विद्यार्थ्यांना नक्कीच मोठे बळ मिळेल आणि वाचनालयातील ग्रंथसंपदा अधिक समृद्ध होईल,” अशा भावना उपस्थित मान्यवरांनी व्यक्त केल्या. पहापळे परिवाराने सामाजिक बांधिलकी जपत केलेल्या या कार्याचे संपूर्ण वणी शहरात कौतुक होत आहे.
कार्यक्रमाचे नेटके आणि उत्कृष्ट सूत्रसंचालन निखिल वैरागडे यांनी केले. या कार्यक्रमाला स्वामी विवेकानंद वाचनालयाचे पदाधिकारी, स्पर्धा परीक्षेचा अभ्यास करणारे असंख्य विद्यार्थी आणि नागरिक मोठ्या संख्येने उपस्थित होते.
