सुनिल तुगनायत, सिटी हब मीडिया वणी…
प्रभाग क्रमांक १३ मधील नागरिकांना पावसाळ्यात होत असलेल्या गैरसोयी लक्षात घेऊन रस्ते, नाल्या व नाली चेंबरची प्रलंबित कामे तातडीने सुरू करण्यात यावीत, अशी मागणी नगरसेवक सैफुर मोबीन रहेमान यांनी वणी नगर परिषदेच्या मुख्याधिकाऱ्यांकडे निवेदनाद्वारे केली आहे.
३० जून २०२६ रोजी सादर करण्यात आलेल्या निवेदनात प्रभागातील अनेक भागांमध्ये अद्याप मूलभूत सुविधांची कामे अपूर्ण असल्याचे नमूद करण्यात आले आहे. यामध्ये श्री. येल्लन्या चाटे ते श्री. शेख रफिक, श्री. मुसा खान ते श्री. कोल्हे, श्री. मनोज उरकुडे ते श्री. शेख रज्जाक तसेच श्री. अकबर खान ते श्री. सुरेश नैताम यांच्या घरांदरम्यान रस्ते व नाल्यांची कामे प्राधान्याने करण्यात यावीत, अशी मागणी करण्यात आली आहे.
नगरसेवकांनी निवेदनात म्हटले आहे की, यापूर्वीही या कामांसाठी अनेकदा पाठपुरावा करण्यात आला होता. मात्र काही प्रस्ताव अद्याप प्रलंबित असून काही ठिकाणी प्रत्यक्ष स्थळ पाहणीदेखील झालेली नाही. त्यामुळे नागरिकांना पावसाळ्यात चिखल, साचलेले पाणी आणि नाल्यांच्या पाण्यामुळे मोठ्या अडचणींना सामोरे जावे लागत आहे.
सध्या मुसळधार पावसामुळे नाल्यांमधील पाणी घरांमध्ये शिरण्याच्या घटना घडत असून परिसरातील रस्त्यांची अवस्था अत्यंत दयनीय झाली आहे. त्यामुळे प्रशासनाने तातडीने स्थळ पाहणी करून आवश्यक मंजुरी देत रस्ते, नाल्या आणि नाली चेंबरच्या कामांना सुरुवात करावी, अशी मागणी निवेदनातून करण्यात आली आहे.
या निवेदनाची प्रत नगर परिषद अध्यक्षांनाही देण्यात आली असून आता प्रशासनाकडून या मागण्यांवर किती लवकर कार्यवाही केली जाते, याकडे प्रभाग क्रमांक १३ मधील नागरिकांचे लक्ष लागले आहे
