सूनिल तुगनायत, सिटी हब मिडिया वणी…
वणी शहरात दिवसेंदिवस बिकट होत चाललेल्या वाहतूक समस्येवर लढा संघटनेने आक्रमक भूमिका घेतली आहे. शहरातील अनियंत्रित वाहतूक, प्रमुख चौकांमधील बेकायदेशीर पार्किंग आणि अनधिकृत वाहन थांबे तात्काळ हटवून वाहतूक व्यवस्था सुरळीत करण्यात यावी, या मागणीसाठी संघटनेच्या वतीने उपविभागीय पोलीस अधिकारी (SDPO) यांना नुकतेच एक निवेदन सादर करण्यात आले.
या निवेदनात वणी शहर आणि परिसरातील वाहतूक कोंडीवर तीव्र चिंता व्यक्त करण्यात आली आहे.
प्रमुख चौकांमध्ये कोंडी, नागरिकांना मनस्ताप…
लढा संघटनेने निवेदनात म्हटले आहे की, वणी शहरातील मुख्य बाजारपेठ, बसस्थानक परिसर आणि प्रमुख चौकांमध्ये प्रवासी ऑटो, ट्रॅव्हल्स तसेच इतर वाहनांनी स्वतःचे अनधिकृत थांबे तयार केले आहेत. रस्त्याच्या मधोमध किंवा चौकातच वाहने उभी राहत असल्याने दररोज तासनतास वाहतूक कोंडी होत आहे. याचा सर्वाधिक फटका रुग्णवाहिका, अग्निशमन दलाची वाहने, शाळकरी मुले, महाविद्यालयीन विद्यार्थी आणि शासकीय कर्मचाऱ्यांना बसत आहे. वाहतूक नियमांचा फज्जा उडाल्यामुळे शहरात अपघातांचे प्रमाणही वाढले आहे.
लढा संघटनेच्या प्रमुख मागण्या…
वाहतूक कोंडीतून वणीकरांची सुटका करण्यासाठी संघटनेने प्रशासनासमोर खालील मागण्या ठेवल्या आहेत:
थांबे हटवणे…
शहरातील सर्व प्रमुख रस्त्यांवरील आणि चौकांमधील बेकायदेशीर वाहन थांबे त्वरित निष्कासित करावेत.
नियमित पोलीस बंदोबस्त…
वाहतुकीचे नियंत्रण करण्यासाठी मुख्य चौकांमध्ये वाहतूक पोलिसांची कायमस्वरूपी नियुक्ती व्हावी.
दंडात्मक कारवाई…
नो-पार्किंग क्षेत्रात किंवा नियमांचे उल्लंघन करून वाहने उभी करणाऱ्यांवर कडक कायदेशीर व दंडात्मक कारवाई करण्यात यावी.
नियोजित वाहनतळ…
ऑटो आणि इतर प्रवासी वाहनांसाठी प्रशासनाने अधिकृत थांबे (Stands) निश्चित करावेत आणि तिथे तसे मार्गदर्शक फलक लावावेत.
विशेष मोहीम व तंत्रज्ञान…
शहरात विशेष वाहतूक सुधारणा मोहीम राबवावी, तसेच प्रमुख चौकांवर सीसीटीव्ही कॅमेऱ्यांच्या माध्यमातून नजर ठेवून नियंत्रण व्यवस्था मजबूत करावी.
आंदोलनाचा इशारा..
वणी शहरातील नागरिकांची सुरक्षितता आणि सार्वजनिक शांतता लक्षात घेता पोलीस प्रशासनाने या मागण्यांवर तात्काळ पावले उचलावीत. यावर योग्य कारवाई न झाल्यास लढा संघटनेच्या वतीने तीव्र लोकशाही मार्गाने आंदोलन छेडले जाईल, असा इशारा निवेदनातून देण्यात आला आहे.
निवेदन सादर करतेवेळी लढा संघटनेचे प्रमुख प्रवीण खानझोडे यांच्यासह आकाश दुबे, जफर खान, अशोक अंकतवार, सुभाष लसंत्ते, तानबाजी कडू आणि संघटनेचे इतर प्रमुख पदाधिकारी व कार्यकर्ते मोठ्या संख्येने उपस्थित होते.
