सुनिल तुगनायत, सिटी हब मिडिया वणी…
वणी रेल्वे स्थानक परिसरातील रेल्वे अभियंता कार्यालयाजवळ सोमवारी (१३ जुलै) रात्री ७:३० ते ८ वाजेच्या सुमारास मालगाडीच्या धडकेत एक तरुण गंभीर जखमी झाला. या अपघातात तरुणाचा एक पाय गुडघ्यापासून शरीरावेगळा झाला आहे. श्रीकांत नानाजी झाडे (वय ३९) असे जखमी तरुणाचे नाव असून तो मूळचा नायगाव (बु.) येथील रहिवासी आहे व सध्या मोहदा येथे आपल्या आईसोबत राहतो.
घटनेचे कारण अस्पष्ट…
हा अपघात रेल्वे रूळ ओलांडताना घडला की संबंधित तरुणाने आत्महत्येचा प्रयत्न केला, याचे कारण अद्याप समजू शकलेले नाही. तरुण रेल्वेखाली आल्याची माहिती मिळताच स्टेशन मास्तर आणि रेल्वे कर्मचाऱ्यांनी घटनास्थळी धाव घेतली. त्यानंतर रेल्वे पोलीस आणि शहर पोलिसांनी घटनास्थळाचा पंचनामा केला.
प्रकृती चिंताजनक…
जखमी श्रीकांतला सुरुवातीला उपचारासाठी स्थानिक ग्रामीण रुग्णालयात दाखल करण्यात आले होते. मात्र, त्याची प्रकृती गंभीर असल्याने प्राथमिक उपचार करून त्याला पुढील वैद्यकीय उपचारासाठी नागपूर येथे हलविण्यात आले आहे. या घटनेचा पुढील तपास पोलीस करत आहेत.
(बातमीत एआई इमेज वापरली आहे…)
