सुनिल तुगनायत, सिटी हब मिडिया वणी…
वणी आणि पांढरकवडा उपविभागातील ग्रामीण भागात गेल्या अनेक दिवसांपासून धुमाकूळ घालणाऱ्या आणि शेतकऱ्यांच्या कृषी साहित्याची चोरी करणाऱ्या एका आंतरजिल्हा टोळीचा छडा लावण्यात स्थानिक गुन्हे शाखा (LCB) यवतमाळ आणि वणी पोलिसांच्या संयुक्त पथकाला मोठे यश आले आहे. या धडक कारवाईत पोलिसांनी ३ मुख्य संशयितांना ताब्यात घेऊन त्यांच्याकडून एकूण १० गुन्हे उघडकीस आणले असून, तब्बल १४ लाख ७३ हजार रुपये किमतीचा मुद्देमाल जप्त केला आहे.
चोरीची पार्श्वभूमी व घटनाक्रम…
गेल्या काही दिवसांपासून वणी व पांढरकवडा उपविभागातील वणी, मारेगाव, पांढरकवडा, मुकुटबन, पारवा, पाटण आणि राळेगाव या पोलीस स्टेशनच्या हद्दीतील शेत शिवारांमधून तसेच इतर ठिकाणांवरून महावितरणच्या इलेक्ट्रिक खांबांवरील ॲल्युमिनियम तार, शेतकऱ्यांचे शेतातील पाण्याचे मोटर पंप आणि केबल वायर चोरीला जाण्याच्या घटनांमध्ये मोठी वाढ झाली होती. चोरांच्या या टोळीने ग्रामीण भागात अक्षरशः थैमान घातले होते, ज्यामुळे शेतकरी वर्ग कमालीचा त्रस्त होता.
या वाढत्या चोऱ्यांची गंभीर दखल घेत यवतमाळचे पोलीस अधीक्षक मा. कुमार चिंता आणि अप्पर पोलीस अधीक्षक मा. अशोक थोरात यांनी स्थानिक गुन्हे शाखेला या टोळीचा छडा लावण्याचे कडक आदेश दिले होते.
अशी झाली अटक आणि कारवाई…
मिळालेल्या आदेशानुसार स्थानिक गुन्हे शाखा वणी/पांढरकवडा पथकाचे सहायक पोलीस निरीक्षक दत्ता पेंडकर व त्यांचे पथक १३ जुलै २०२६ रोजी वणी पोलीस स्टेशन हद्दीत गस्त घालत होते. पेट्रोलिंग दरम्यान पथकाला गोपनीय सूत्रांकडून खात्रीशीर माहिती मिळाली की, वणी पोलीस स्टेशन अभिलेखावरील चोरीच्या गुन्ह्यातील संशयित आरोपी हे वणी येथील रंगनाथ नगरजवळील खुल्या मैदानात एकत्र जमले आहेत.
पोलिसांनी तात्काळ सापळा रचून रंगनाथ नगरमधील खुल्या मैदानातून संशयितांना ताब्यात घेतले. सुरुवातीला त्यांनी पोलिसांना उडवाउडवीची उत्तरे दिली, परंतु पोलिसी खाक्या दाखवताच मुख्य आरोपी शेख समीर याने गुन्ह्याची कबुली दिली. आरोपींनी एका मालवाहू वाहनाचा (क्रमांक MH/34/BZ/6522) वापर करून पांढरकवडा, राळेगाव, पाटण, मारेगाव, मुकुटबन आणि पारवा पोलीस स्टेशन हद्दीतून मोठ्या कटरच्या साहाय्याने खांबांवरील ॲल्युमिनियम तार व शेतातील मोटर पंप चोरल्याचे कबूल केले. तसेच हा चोरलेला सर्व माल त्यांनी शास्त्री नगर, वणी येथील भंगार व्यावसायिक निसार खान याला विकल्याचे सांगितले.
त्यानंतर पोलिसांनी तात्काळ तांत्रिक आणि गोपनीय माहितीच्या आधारे घोन्सा टी-पॉईंटजवळ सापळा रचून भंगार दुकानदार निसार खान याला त्याच्या मालवाहू गाडीसह (क्रमांक MH/29/BE/8442) ताब्यात घेतले. गाडीची झडती घेतली असता त्यात १११० किलो चोरीचा ॲल्युमिनियम तार जप्त करण्यात आला. तसेच मुख्य आरोपी शेख समीर याच्या घराच्या मोकळ्या जागेतून चोरलेली केबल जाळून काढलेली तांब्याची तार आणि सबमर्सीबल मोटार जप्त करण्यात आली.
अटक करण्यात आलेले आरोपी:
१) शेख समीर ऊर्फ समीर शेख अमीर (वय २६ वर्ष, रा. रंगनाथ नगर, वणी)
२) सैय्यद अली ऊर्फ सैय्यद गुलाब (वय ३५ वर्ष, रा. रंगनाथ नगर, वणी)
३) निसार खान ऊर्फ निसारोद्दीन खान जलालोद्दीन खान (वय ५२ वर्ष, रा. शास्त्री नगर, वणी – भंगार दुकानदार)
(या गुन्ह्यात एक विधी संघर्षग्रस्त बालक व वाहनाचा ड्रायव्हर दीपक यांचाही समावेश आहे).
जप्त करण्यात आलेला एकूण मुद्देमाल (एकूण किंमत: १४,७३,०००/- रुपये):
ॲल्युमिनियम तार: वजन अंदाजे १११० किलो — किंमत रु. ३,३०,०००/-
तांब्याची तार (केबल जाळून काढलेली): वजन १४ किलो — किंमत रु. २४,०००/-
सबमर्सीबल पाण्याची मोटार: ०१ नग — किंमत रु. १४,०००/-
चोरीचा माल नेणारे मालवाहू वाहन (क्र. MH/29/BE/8442): किंमत रु. ५,००,०००/-
चोरीत वापरलेले मालवाहू वाहन (क्र. MH/34/BZ/6522): किंमत रु. ६,००,०००/-
तार कापण्याचे कटर (चिमटा): ०१ नग — किंमत रु. ५,०००/-
कारवाईत सहभागी असलेले पोलीस अधिकारी व अंमलदार:
ही यशस्वी कामगिरी यवतमाळ जिल्ह्याचे पोलीस अधीक्षक मा. कुमार चिंता, अप्पर पोलीस अधीक्षक मा. अशोक थोरात आणि स्थानिक गुन्हे शाखेचे पोलीस निरीक्षक श्री. सतीश चवरे यांच्या मार्गदर्शनाखाली पार पडली.
कारवाई करणारे प्रत्यक्ष पथक:
दत्ता पेंडकर (सहाय्यक पोलीस निरीक्षक, स्थानिक गुन्हे शाखा, वणी/पांढरकवडा पथक)
धनराज ढाके (पोलीस उपनिरीक्षक)
सुनील खंडागळे (पोलीस हवालदार)
सुधीर पांडे (पोलीस हवालदार)
सुधीर पिदुरकर (पोलीस हवालदार)
रजनीकांत मडावी (पोलीस शिपाई)
सलमान शेख (चालक पोलीस शिपाई)
सतीश फुके (पोलीस हवालदार)
