सुनिल तुगनायत, सिटी हब मिडिया वणी…
सीसीटीव्ही आणि तांत्रिक तपासाच्या आधारे आंतरजिल्हा वाहनचोर टोळीचा पर्दाफाश; लातूरमधून ट्रक जप्त…
वणी शहरातील लालपुलिया परिसरातून चोरीला गेलेल्या तब्बल २५ लाख रुपये किमतीच्या टाटा हायवा ट्रकचा शोध घेण्यात वणी पोलिसांना मोठे यश मिळाले आहे. या कारवाईत वाहनचोरी करणाऱ्या आंतरजिल्हा टोळीतील चार संशयितांना अटक करण्यात आली असून, चोरीचा ट्रक लातूर जिल्ह्यातून जप्त करण्यात आला आहे.
१ जून २०२६ रोजी विशाल लॉजिस्टिक्स ट्रान्सपोर्ट कंपनीचा सीजी-०४ एनव्ही-१४८१ क्रमांकाचा बारा चाकी हायवा ट्रक लालपुलिया परिसरातून चोरीला गेला होता. याप्रकरणी कंपनीचे सुपरवायझर हर्षल लोहबळे यांनी वणी पोलीस ठाण्यात तक्रार दाखल केली होती. त्यानंतर पोलिसांनी तातडीने तपास सुरू केला.
ठाणेदार भानुदास पिदुरकर यांच्या नेतृत्वाखालील डी.बी. पथकाने सीसीटीव्ही फुटेज, मोबाईल लोकेशन आणि इतर तांत्रिक पुराव्यांची बारकाईने पडताळणी केली. तपासादरम्यान या गुन्ह्याचे धागेदोरे चंद्रपूर व नागपूर जिल्ह्यांपर्यंत पोहोचले. त्याआधारे पोलिसांनी अजय केसकर, राजू उर्फ जयप्रकाश केसकर, हिरालाल कश्यप आणि रविशंकर प्रसाद या चौघांना ताब्यात घेतले.
चौकशीदरम्यान आरोपींनी चोरीचा ट्रक लातूर परिसरात लपवून ठेवल्याची माहिती दिली. त्यानुसार पोलिसांनी तेथे धाड टाकून सुमारे २५ लाख रुपये किमतीचा हायवा ट्रक हस्तगत केला.
या टोळीचा इतर वाहनचोरीच्या घटनांशी संबंध आहे का, याचा तपास सुरू असून आणखी काही गुन्ह्यांचा उलगडा होण्याची शक्यता पोलिसांनी व्यक्त केली आहे.
ही कारवाई पोलीस अधीक्षक कुमार चिंता, अपर पोलीस अधीक्षक अशोक थोरात आणि उपविभागीय पोलीस अधिकाऱ्यांच्या मार्गदर्शनाखाली ठाणेदार भानुदास पिदुरकर यांच्या नेतृत्वात पार पडली. डी.बी. पथकातील पोउपनि साजिद सय्यद तसेच गजानन सावसाकडे, मोरेश्वर खंडारे, नंदकुमार पुप्पलवार, गणेश मेश्राम, नितेश भोयर आणि रितेश भोयर यांनी या मोहिमेत महत्त्वाची भूमिका बजावली.
