सुनिल तुगनायत, सिटी हब मिडिया वणी…
रोटरी क्लब ऑफ ब्लॅक डायमंड सिटी वणीच्या रोटरी वर्ष २०२६-२७ च्या पदग्रहण सोहळ्याला सामाजिक उपक्रमाची जोड देत यंदाचा कार्यक्रम संस्मरणीय ठरला. शनिवार, ८ ऑगस्ट रोजी एस.बी. हॉल येथे झालेल्या दिमाखदार सोहळ्यात रोटेरियन अश्विनकुमार कोंडावार यांनी अध्यक्षपदाची, तर रोटेरियन अचल जोबनपुत्रा यांनी सचिवपदाची सूत्रे स्वीकारली.
या सोहळ्याचे औचित्य साधून रोटरी क्लब ऑफ ब्लॅक डायमंड सिटी वणीतर्फे चिखलगाव येथील श्री रामदेव बाबा मूकबधिर विद्यालयातील विद्यार्थ्यांसाठी आधुनिक डिजिटल क्लासरूमची निर्मिती करण्यात आली. विद्यार्थ्यांना तंत्रज्ञानाच्या माध्यमातून अधिक प्रभावी, सुलभ आणि आनंददायी शिक्षण मिळावे, या उद्देशाने हा उपक्रम राबविण्यात आला.
मान्यवरांच्या उपस्थितीत पदग्रहण…
कार्यक्रमाला Rtn. निलेश परतानी (DGN 3030) प्रमुख पाहुणे म्हणून उपस्थित होते. यावेळी आमदार संजयभाऊ देरकर, माजी आमदार संजीवरेड्डी बोडकुरवार, वणी नगरपरिषदेच्या अध्यक्षा सौ. विद्याती अत्राम, तसेच Rtn. डॉ. संदीप मुडे आणि Rtn. निखिल केडिया यांची प्रमुख उपस्थिती होती.
यावेळी नवनिर्वाचित संचालक मंडळाचा पदग्रहण सोहळा पार पडला. तसेच रोटरीच्या कार्याशी जोडल्या गेलेल्या नवीन सदस्यांचे स्वागत करून त्यांचा रोटरी परिवारात समावेश करण्यात आला.
अश्विनकुमार कोंडावार यांच्या संकल्पनेतून डिजिटल क्लासरूम…
नवनिर्वाचित अध्यक्ष अश्विनकुमार कोंडावार यांच्या संकल्पनेतून चिखलगावच्या श्री रामदेव बाबा मूकबधिर विद्यालयात डिजिटल क्लासरूम साकारण्यात आली. या वर्गात विद्यार्थ्यांना डिजिटल माध्यमातून शैक्षणिक साहित्य उपलब्ध होणार असून, पारंपरिक शिक्षणासोबत आधुनिक तंत्रज्ञानाची सांगड घालण्याचा प्रयत्न करण्यात आला आहे.
मूकबधिर विद्यार्थ्यांसाठी शिक्षण अधिक दृकश्राव्य आणि समजण्यास सोपे व्हावे, तसेच त्यांच्यातील शैक्षणिक क्षमता विकसित होण्यास मदत व्हावी, हा या उपक्रमामागील मुख्य उद्देश आहे.
‘Create Lasting Impact’चा सकारात्मक संदेश…
रोटरीच्या ‘Create Lasting Impact’ या संकल्पनेला अनुसरून शिक्षण आणि सामाजिक बांधिलकीच्या क्षेत्रात हा उपक्रम राबविण्यात आला. केवळ पदग्रहणाचा सोहळा न करता समाजातील गरजू घटकांसाठी उपयुक्त ठरेल, असा उपक्रम राबवून रोटरी क्लबने सामाजिक कार्याची दिशा अधोरेखित केली.
माजी अध्यक्ष Rtn. लवलेश लाल आणि माजी मानद सचिव Rtn. गौरव जोबनपुत्रा यांच्या कार्यकाळात सुरू झालेली समाजोपयोगी उपक्रमांची परंपरा पुढे नेण्याचा निर्धार यावेळी व्यक्त करण्यात आला.
पदग्रहण सोहळ्यास रोटरी क्लबचे पदाधिकारी, सदस्य, मान्यवर, शिक्षक, विद्यार्थी आणि नागरिक मोठ्या संख्येने उपस्थित होते. पदग्रहणासोबतच दिव्यांग विद्यार्थ्यांच्या शिक्षणासाठी डिजिटल क्लासरूमची दिलेली भेट ही या सोहळ्याची विशेष आकर्षण ठरली.
