सुनिल तुगनायत, सिटी हब मिडिया वणी…
महागड्या ‘आयफोन’च्या नादात नातवानेच मारला आजोबांच्या दागिन्यांवर डल्ला; वणी पोलिसांकडून ६.७२ लाखांच्या घरफोडीचा छडा…
हातात महागडा ‘आयफोन १६ प्रो’ मिरवण्याच्या हव्यासापोटी एका अल्पवयीन नातवाने आपल्याच सख्ख्या आजोबांच्या घरातील तब्बल पावणेसात लाखांचे सोन्याचे दागिने चोरल्याची धक्कादायक घटना उघडकीस आली आहे. या प्रकरणात स्थानिक डी.बी. पथकाने कारवाई करत एका अल्पवयीन बालकासह त्याच्या मित्राला जेरबंद केले असून, संपूर्ण ५२ ग्रॅम सोन्याचा मुद्देमाल हस्तगत केला आहे.
कनकवाडी येथील रहिवासी बंडू विठोबा बोढाले (वय ६२) यांच्या राहत्या घरातून २० ते २१ ऑगस्टच्या रात्री कपाटाची तिजोरी उघडून ६ लाख ७२ हजार रुपये किमतीचे सोन्याचे दागिने लंपास करण्यात आले होते. याप्रकरणी १ सप्टेंबर रोजी वणी पोलीस ठाण्यात अज्ञात चोरट्यांविरुद्ध गुन्हा दाखल झाला होता.
अशी उघडकीस आली चोरी…
पोलीस निरीक्षक भानुदास पिदूरकर यांच्या मार्गदर्शनाखाली गुन्हे शोध पथक (डी.बी. पथक) समांतर तपास करत असताना, संविधान चौक परिसरात संशयितांची हालचाल टिपण्यात आली. पोलिसांनी सापळा रचून विठ्ठलवाडी येथील गुणवंत ऊर्फ पोलार्ड पांडुरंग दानव (वय २३) आणि एका विधीसंघर्षग्रस्त बालकाला ताब्यात घेतले. खाक्या दाखवून चौकशी करताच धक्कादायक कट समोर आला.
सदर अल्पवयीन मुलाला ‘आयफोन १६ प्रो’ खरेदी करण्याची तीव्र इच्छा होती. त्याने ही बाब मित्र गुणवंत आणि सुरज हुसेन गेडाम (वय २५, रा. दहेगाव विरखुंड) यांना सांगितली. या दोघांनी त्याला थेट स्वतःच्याच आजोबांच्या घरातील सोन्यावर डल्ला मारण्यास प्रवृत्त केले. त्यानुसार नातवाने चावीने आजोबांचे लोखंडी कपाट उघडून सोन्याचे दागिने चोरले.
विक्रीसाठी पळण्याच्या तयारीत असताना बेड्या…
चोरी केलेले सोने विकण्यासाठी हे आरोपी चंद्रपूर अथवा नागपूरकडे पळून जाण्याच्या प्रयत्नात असताना पोलिसांनी २ सप्टेंबर रोजी मध्यरात्री २ वाजण्याच्या सुमारास त्यांना संविधान चौकातून ताब्यात घेतले. त्यांच्याकडून २५ ग्रॅमचा चपलाकंठी हार, दोन गोप (१५ ग्रॅम व ५ ग्रॅम) आणि कानातील टॉप्स असे एकूण ५२ ग्रॅम वजनाचे ६ लाख ७२ हजार रुपयांचे सोन्याचे दागिने जप्त करण्यात आले आहेत. या प्रकरणातील तिसरा संशयित आरोपी सुरज गेडाम सध्या फरार असून पोलीस त्याचा शोध घेत आहेत.
सदर यशस्वी कारवाई जिल्हा पोलीस अधीक्षक कुमार चिंता, अप्पर पोलीस अधीक्षक अशोक थोरात, उपविभागीय पोलीस अधिकारी सुरेश दळवे यांच्या मार्गदर्शनाखाली ठाणेदार भानुदास पिदूरकर, डी.बी. पथक प्रमुख पोलीस उपनिरीक्षक सय्यद साजिद, हवालदार गजानन सावसाकडे, अंमलदार गणेश मेश्राम, नंदकुमार पुप्पलवार, मोनेश्वर खांदरे आणि रितेश भोयर यांनी पार पाडली.
