सुनिल तुगनायत सिटी हब मिडिया वणी…
ऑनलाईन औषध विक्रीला तीव्र विरोध करत ऑल इंडिया ऑर्गनायझेशन ऑफ केमिस्ट्स अँड ड्रगिस्ट्स (AIOCD) आणि महाराष्ट्र राज्य केमिस्ट्स अँड ड्रगिस्ट्स असोसिएशन (MSCDA) च्या वतीने २० मे रोजी देशव्यापी लाक्षणिक संपाची हाक देण्यात आली आहे. या संपाला पाठिंबा देत यवतमाळ जिल्हा आणि वणी तालुका केमिस्ट अँड ड्रगिस्ट असोसिएशनच्या वतीने वणी परिसरातील सर्व औषध दुकाने बंद ठेवण्यात येणार असल्याची माहिती अधिकृत पत्रकाद्वारे देण्यात आली आहे.
मुख्य मागण्या काय आहेत?
केमिस्ट असोसिएशनने शासनाकडे खालील प्रमुख मागण्या मांडल्या आहेत:
१. ऑनलाईन औषध विक्री त्वरित बंद करा: ऑनलाईन औषध विक्री संदर्भातील GSR 817 (दि. २८.०८.२०१८) कायदा मागे घेण्यात यावा.
२. अनधिकृत डिस्काउंटला लगाम: कॉर्पोरेट्स कंपन्यांद्वारे दिली जाणारी अव्यवसायिक आणि अवाजवी सूट बंद करण्यात यावी.
३. देशाला बनावट औषधांपासून वाचवा: कोविड काळातील GSR 220 (दि. २६.०३.२०२०) हा कायदा मागे घेऊन बनावट औषधांच्या पुरवठ्यावर कडक बंदी घालावी.
रुग्णांच्या जिवाशी खेळ आणि सामाजिक संकट!
वणी तालुका केमिस्ट असोसिएशनचे अध्यक्ष श्री. लक्ष्मण उरकुडे यांनी प्रसिद्धीस दिलेल्या पत्रकात म्हटले आहे की, “ऑनलाईन औषधे खरेदी करणे म्हणजे रुग्णांच्या जिवाशी खेळण्यासारखे आहे. ऑनलाईन विक्री करणाऱ्या कंपन्या औषधांची गुणवत्ता, एक्सपायरी डेट आणि दुष्परिणामांची कोणतीही जबाबदारी घेत नाहीत. याशिवाय, अंमली पदार्थांचे वर्गीकरण असणारी ‘नारकोटिक औषधे’ (Narcotic Medicines) ऑनलाईन सहज उपलब्ध होत असल्याने आणि डॉक्टरांच्या चिठ्ठीची (Prescription) पडताळणी होत नसल्याने तरुण पिढी व्यसनाच्या आहारी जात आहे, जे मोठे सामाजिक संकट आहे.” तसेच ऑनलाईन व्यवसायामुळे किरकोळ औषध विक्रेत्यांवर बेरोजगारीची कुऱ्हाड कोसळत असल्याचेही त्यांनी नमूद केले.
ग्राहकांना आवाहन: आजच औषधे खरेदी करा!
हा संप केवळ एक दिवसाचा लाक्षणिक संप असून, शासनाने योग्य कारवाई न केल्यास भविष्यात बेमुदत संप पुकारण्याचा इशारा असोसिएशनने दिला आहे. संपाच्या काळात रुग्णांची गैरसोय होऊ नये, म्हणून सर्व नागरिकांनी आणि वैद्यकीय ग्राहकांनी आपली जीवनावश्यक औषधे १९ मे रोजीच खरेदी करून ठेवावीत, असे आवाहन वणी तालुका केमिस्ट अँड ड्रगिस्ट असोसिएशनच्या वतीने करण्यात आले आहे. रुग्णांना होणाऱ्या तात्पुरत्या गैरसोयीबद्दल असोसिएशनने दिलगिरी व्यक्त केली आहे.
