सुनिल तुगनायत, सिटी हब मिडिया वणी…
धावपळीच्या युगात आजही प्रामाणिकपणा जिवंत असल्याचा प्रत्यय वणी येथे आला आहे. येथील बसस्थानक परिसरात एका महिलेची विसरलेली बॅग वणी पोलिसांच्या सतर्कतेमुळे आणि प्रामाणिकतेमुळे तिला सुखरूप परत मिळाली. या कौतुकास्पद कामगिरीमुळे वणी पोलीस दलाची मान उंचावली असून सर्व स्तरांतून त्यांच्यावर अभिनंदनाचा वर्षाव होत आहे.
नेमके काय घडले?
टाकडघाट (ता. हिंगणा) येथील रहिवासी असलेल्या पूजा वीरू राऊत (वय २८) या रविवारी, २४ मे रोजी दुपारी दीड वाजेच्या सुमारास काही कामानिमित्त वणी बसस्थानकावर आल्या होत्या. यावेळी प्रवासाच्या घाईगडबडीत त्यांची महत्त्वाची कागदपत्रे आणि रोकड असलेली हँडबॅग बसस्थानक परिसरातच कुठेतरी गहाळ झाली. बॅग हरवल्याचे लक्षात येताच त्यांनी सर्वत्र धावपळ करून शोध घेतला, मात्र ती कुठेही मिळून आली नाही. त्यामुळे त्या अत्यंत हवालदिल झाल्या होत्या.
पोलिसांची सतर्कता आणि प्रामाणिकपणा…
त्याच वेळी बसस्थानक परिसरात बंदोबस्तावर तैनात असलेले वणी पोलीस स्टेशनचे पोलीस शिपाई रितेश (बिल्ला क्र. १६९९) यांना एक बेवारस बॅग आढळून आली. सुरक्षेच्या कारणास्तव त्यांनी बॅगची तपासणी केली असता, त्यात काही महत्त्वाची कागदपत्रे आणि रोख रक्कम असल्याचे त्यांच्या निदर्शनास आले.
पोलीस शिपाई रितेश यांनी कोणतीही दिरंगाई न करता तातडीने या घटनेची कल्पना वणी पोलीस ठाण्यातील वरिष्ठ अधिकाऱ्यांना दिली आणि बॅगच्या खऱ्या मालकाचा शोध सुरू केला.
कष्टाची कमाई सुखरूप हाती…
काही वेळातच पोलिसांना हवालदिल अवस्थेत फिरणाऱ्या पूजा राऊत यांचा शोध घेण्यात यश आले. पोलिसांनी त्यांच्याकडे बॅगेतील वस्तू आणि रकमेबाबत सविस्तर चौकशी करून योग्य ती खातरजमा केली. खात्री पटल्यानंतर पोलीस शिपाई रितेश यांनी ती पैशांची बॅग सन्मानपूर्वक पूजा राऊत यांच्या स्वाधीन केली.
आपली हरवलेली बॅग आणि कष्टाची रोकड सुरक्षित हाती पडताच पूजा राऊत यांच्या जीवात जीव आला. त्यांनी वणी पोलीस प्रशासनाचे आणि विशेषतः पोलीस शिपाई रितेश यांचे हात जोडून आभार मानले. पोलिसांच्या या तत्परतेमुळे नागरिकांमधील पोलिसांबद्दलचा आदर आणि विश्वास कमालीचा वाढला आहे.
