सुनिल तुगनायत, सिटी हब मिडिया वणी…
शहरातील विठ्ठलवाडी, वडगाव रोड परिसरात एक मोठी घरफोडीची घटना समोर आली आहे. घरमालक कौटुंबिक कामानिमित्त नागपूरला गेले असता, अज्ञात चोरट्यांनी बंद घराचे कुलूप तोडून आत प्रवेश केला. चोरट्यांनी बेडरूममधील अलमारीतून सोन्या-चांदीचे दागिने आणि रोख रकमेसह एकूण २,९५,००० रुपयांचा (२ लाख ९५ हजार) मुद्देमाल लंपास केला आहे. या प्रकरणी वणी पोलीस ठाण्यात गुन्हा दाखल करण्यात आला आहे.
नागपूरला गेले अन् मागे घर फुटले:
पोलीस सूत्रांकडून मिळालेल्या माहितीनुसार, विठ्ठलवाडी येथील रहिवासी आणि व्यवसायाने कारडेकोर असलेले तालिब अयुब खान (वय २८ वर्षे) हे २२ मे २०२४ रोजी दुपारी ४ वाजताच्या सुमारास आपल्या घराला कुलूप लावून नागपूर येथे गेले होते. दरम्यान, दि. २२ ते ३१ मे या कालावधीत घर बंद असल्याचा फायदा अज्ञात चोरट्याने घेतला. चोरट्याने मुख्य दरवाजाचा कोंडा आणि कुलूप तोडून घरात प्रवेश केला. रविवारी, ३१ मे रोजी दुपारी २ वाजता खान कुटुंबिय परत आले असता, त्यांना घराचा दरवाजा तुटलेला आणि बेडरूममधील सामान अस्ताव्यस्त पडलेले दिसले. अलमारी तपासली असता चोरीचा हा धक्कादायक प्रकार उघडकीस आला.
चोरीला गेलेल्या मालाचा तपशील:
चोरट्यांनी कपाटातून जुन्या किमतीप्रमाणे खालील मुद्देमाल चोरून नेला:
सोने (३७ ग्रॅम, किंमत १,८५,००० रुपये): ३ सोन्याच्या अंगठ्या (९ ग्रॅम), एक सोन्याचा गोप (८ ग्रॅम), आणि एक सोन्याचा हार (२० ग्रॅम).
चांदी (५०० ग्रॅम, किंमत ३०,००० रुपये): चांदीचा हार, कानातले २ जोड, जोडवे, ११ जोड चांदीची पायल आणि १ जोड पैंजण.
रोख रक्कम (८०,००० रुपये): यामध्ये ५०० रुपयांच्या १२६ नोटा, १०० रुपयांच्या १३० नोटा, २० रुपयांच्या १०० नोटा, १० रुपयांच्या १०० नोटा आणि १० रुपयांचे १०० शिक्के समाविष्ट होते.
पोलीस तपास सुरू:
या प्रकरणी फिर्यादी तालिब खान यांच्या जबानी रिपोर्टवरून वणी पोलीस ठाण्यात अज्ञात आरोपीविरुद्ध भारतीय न्याय संहिता (BNS) च्या कलम ३३१ (३), ३३१ (४) आणि ३०५(a) अन्वये गुन्हा नोंद करण्यात आला आहे. या घटनेचा पुढील तपास वणी पोलीस स्टेशनचे पोलीस उपनिरीक्षक अंकुश वडतकर करत आहेत. भरवस्तीत झालेल्या या मोठ्या घरफोडीमुळे परिसरात व्यापाऱ्यांमध्ये आणि नागरिकांमध्ये चिंतेचे वातावरण पसरले आहे.
