सुनिल तुगनायत, सिटी हब मिडिया वणी…
वणीत गोवंश वाहतुकीवर पोलिसांचा घाला; दोन गोवंशांची सुटका, तिघांवर गुन्हा…
वणी तालुक्यातील मोहर्ली परिसरात गोवंशांची कथित अवैध वाहतूक करणाऱ्या तिघांविरुद्ध वणी पोलिसांनी गुन्हा दाखल केला आहे. या कारवाईत दोन गोवंश जनावरे व एक बोलेरो पिकअप वाहन जप्त करण्यात आले.
पोलिसांनी दिलेल्या माहितीनुसार, रविवारी (८ जून) रात्री सुमारे १० वाजताच्या सुमारास मोहर्ली गावाजवळ संशयास्पदरीत्या फिरणाऱ्या बोलेरो पिकअप (क्र. TG-01-C-1290) वाहनाची तपासणी करण्यात आली. तपासणीदरम्यान वाहनामध्ये दोन गोवंश जनावरे अत्यंत कमी जागेत कोंबून, आखूड दोऱ्यांनी बांधून तसेच चारा-पाण्याची कोणतीही व्यवस्था न करता वाहतूक केली जात असल्याचे आढळून आले.
या प्रकरणी पुणाजी गुलाब मेश्राम (वय २६, रा. मोहर्ली) यांच्या तक्रारीवरून मोहम्मद जलाल मोहम्मद वखारउद्दीन (रा. यापलगोडा, जि. आदिलाबाद), कैलास दत्तु कांबळे (रा. यापलगोडा, जि. आदिलाबाद) आणि नवनाथ गोरखनाथ जाधव (रा. मोहर्ली, ता. वणी) यांच्याविरुद्ध गुन्हा दाखल करण्यात आला आहे.
आरोपींविरुद्ध महाराष्ट्र पशु संरक्षण अधिनियम, १९७६ च्या कलम ५, ५(अ), ५(ब), ९ व ११ तसेच प्राण्यांना निर्दयतेने वागविण्यास प्रतिबंध अधिनियम, १९६० च्या कलम ११(१)(ड), ११(१)(इ) व ११(१)(एफ) अंतर्गत कारवाई करण्यात आली आहे.
या कारवाईत अंदाजे १५ हजार रुपये किमतीची दोन गोवंश जनावरे तसेच सुमारे अडीच लाख रुपये किमतीचे बोलेरो पिकअप वाहन असा एकूण मुद्देमाल जप्त करण्यात आला. प्रकरणाचा पुढील तपास पोलीस हवालदार निलकमल भोसले करीत आहेत.
